Banorët e rrugës “Pasho Hysa-Ali Dem” në Tiranë kanë denoncuar gjendjen tejet problematike të rrugës, e cila prej kohësh është kthyer në një shqetësim serioz për komunitetin.
Sipas tyre, uji rrjedh pandërprerë nga fillimi deri në fund të rrugës, duke krijuar gropa të mëdha dhe duke e bërë pothuajse të pamundur qarkullimin normal të automjeteve dhe këmbësorëve. Situata, sipas banorëve, po përkeqësohet çdo ditë.
Për JOQ ata shprehen se pavarësisht njoftimeve të vazhdueshme, UKT nuk ka ndërmarrë asnjë ndërhyrje për të zgjidhur problemin, duke i lënë banorët në mëshirë të fatit. Rruga, e cila përdoret çdo ditë nga dhjetëra familje, është kthyer në një rrezik të vërtetë për aksidente.
Banorët bëjnë apel për publikimin e situatës dhe kërkojnë ndërhyrje të menjëhershme nga autoritetet për të parandaluar dëme të mëtejshme dhe për të rikthyer normalitetin në zonë.
Në denoncimin e tyre, ata shprehen: “Përshëndetje JOQ, ndodhemi në rrugën Pasho Hysa – Ali Dem dhe gjendja është skandaloze. Uji rrjedh nga fillimi deri në fund të rrugës, UKT në gjumë, nuk vijnë dhe gropat janë pa fund. Mezi po kalojmë. Ju lutem publikojeni se jemi në hall me këtë rrugë.”
