Kreu i “Shqipëria Bëhet”, Adriatik Lapaj, ka reaguar në lidhje me procedimin penal të regjistruar ndaj tij, për protestën që ka zhvilluar para Kryeministrisë.
Në një lidhje Live, në rrjete sociale, Lapaj e ka cilësuar procedimin e regjistruar ndaj tij si një dekoratë që ka luftuar kundër regjimit më komik në botë, ndërsa është shprehur se nuk e intimidojnë dot.
Teksa ka renditur aferat që kanë përfshirë qeverinë, Lapaj ka paralajmëruar sërish protestë te Kryeministria pasditen e sotme në orën 17:00.
“Kallëzimi është dekoratë në gjoksin tim, që kam luftuar përballë regjimit më komik në botë. Kjo qeveri, këta janë edhe hajdutë edhe komikë. Bllokova trotuarin, meme e madhe. I vlerësoj punonjësit e policisë së shtetit, por paskan bojë e letër, kohë për mua, kur ka nga ata që vodhën 50 mln euro me tunelin e Llogarasë. Me kallëzime për bllokime rrugësh ndaj meje do mbulojë vjedhjet dhe mungesën e ilaçeve? Si do ai të jemi të gjithë memecë e të heshtim? Të mos e themi që nuk ka ilaçe te Onkologjiku? Mua do të më trembë ai?
Mos të themi inceneratorët mungojnë dhe miliona euro janë në cicat e këtij apo atij? Mos të themi që u vodhën para në tunelin e Llogarasë. Imagjino të derdhet Tirana këtu, imagjino ç’bën ky burrë frikacak që fshihet pas letrave të bakallit që firmosin zarat e tij. Kë paskam penguar të mos shkonte të spital, punë apo kudo. Nuk më intimidojnë. Përkundrazi në orën 5 ftoj sërish qytetarët të Kryeministria”,– është shprehur Lapaj ndër të tjera.
Procedimi ndaj Lapajt, u njoftua këtë të mërkurë nga Policia, e cila në njoftimin zyrtar, pretendonte se Lapaj ka zaptuar hapësirën publike përpara godinës së Kryeministrisë, duke penguar qarkullimin e lirë të lëvizjes.
Por dukshëm procedimi ka ardhur me ‘urdhër nga lart’, kjo pasi edhe ditën e djeshme, Rama i çoi Policinë Lapajt te Kryeministria, ku tentuan të largonin me forcë protestuesit.
Lapaj ka paralajmëruar se protesa do të vijojë edhe në ditët në vazhdim, ndërsa qëllimi i saj sipas tij është largimi i Edi Ramës nga posti.
