Anëtarët e ekuipazhit të një aeroplani transporti ushtarak rus An-22, që u rrëzua në rajonin e Ivanovos, në verilindje të Moskës, u vranë të gjithë në aksidentin.
Kështu njoftoi sot Komiteti Hetimor Rus, por pa përcaktuar numrin e personave që gjendeshin në bord.
Në një deklaratë më parë, Ministria Ruse e Mbrojtjes theksoi se “gjatë një fluturimi provë, pas punimeve të riparimit, një avion transporti ushtarak An-22 u rrëzua, avioni ra në një zonë të pabanuar”.
Më parë, një burim i paidentifikuar i shërbimeve të shpëtimit i tha agjencisë ruse të lajmeve TASS se shtatë persona mund të kenë qenë në bordin e avionit.
Deri më tani, autoritetet ruse nuk kanë thënë nëse incidenti mund të lidhet me konfliktin e armatosur në Ukrainë.
