Analisti Fatos Lubonja foli pasditen e sotme në News24 lidhur me 8 dhjetorin, Ditën e Rinisë, që simbolizon dhe fillimin e rënies së regjimit komunist në Shqipëri në fillim të viteve ’90.
Lubonja thekson se të rinjtë sot jetojnë në Shqipër në një regjim që i blen njerëzit ose i detyron të largohen nga vendi i tyre.
“Jetojmë në një regjim që i mpak njerëzit, i poshtëron, i blen, i përdor, i dërgon jashtë njerëzit. Mua më kujtohet në komunizëm qenë si festa si 1 maji apo festa e gruas, që festoheshin. Në botën demokratike ishin ditë protestash. Edhe 8 marsi. Kështu duhet të kishte qenë dhe festa jonë këtu. Për kërkesa të mëtejshme të rinisë. Ça themele demokracie, kemi hedhur?! Kështu më duket mua.”
Sipas tij, të rinjtë duhet të krijojnë vetë hapësira kur pushtetarët ua mbyllin ato.
“Hapësirat duhen krijuar. Duhet rinia t’i marrë këto hapësira. Hapësirat e mëdha janë universitetet. Qendra progresi, ku mblidheshin të rinjtë. Këtu te ne është në shuarje, është në një konformizëm. Hapësirat duhen krijuar në kokë, kur ke dëshirë dhe pasione fillon e mblidhesh e lufton për të. Nuk është demokraci kjo që jetojmë.
Sidomos te rinia është çështja e madhe të krijosh të shprehin potencialitetet e tyre si qenie njerëzore që janë në rritje. Duhet të kesh liri. Nuk duhet ta imitojmë atë kohë. Ajo kohë ishte një liri e fituar. Ra muri i Berlinit. Akt i fuqishëm ishte ikja nga vendi. Kjo ikje është thelluar tani. Besoj se nuk duhen ndarë në dy periudha. Fakti që na dhuruan lirinë, na ka sjellë këtu.”
Sa i përket thirrjes së opozitës që rinia të bashkohet me ta në protesta, Lubonja thotë rinia duhej të ishtë në shesh për skandalin e 50 mln eurove të Tunelit të Llogarasë.
“Është një thirrje që bëhet nga njerëz që e kanë humbur një lloj besimi. Thotë bashkohuni me udhëheqjen tonë. Ajo që i mungon politikës përfshirja reale e rinisë, në parti. Kontakti direkt me liderët e partisë. Politika jonë e ka katandisur popullin në stadium na shikoni si luajmë ne. Demokracia nuk është kjo, është vendimmarrje në jetën politike të vendit. Ky lloj autoritarizmi që kërkon rininë në një protestë por nuk e mobilizon ditë për ditë me pasion politik, nuk ecën.
Mazhoranca është katastrofë nga ana tjetër, opozita është në stilin e vjetër. Përçarja është në një lloj dëshpërimi. Në një kohë i gjithë populli duhet të ishte te kryeministria për skandalin. Për 700 mijë euro ju kujtoj doli populli përpara kryeministrisë. Tani bëhet fjalë për 50 mln euro dhe populli dhe rinia janë indiferent.”
Analistin shton se ka humbur ndjeshmëria e njerëzve ndaj skandaleve.
“Më duket sikur janë të gjithë në një teatër, ka humbur ndjeshmëria. Përgjithësisht është reduktuar njeriu në atë sa fitoj, sa kam, sa marr. Është katandisur vetëm për bukën e gojës. Është fatkeqësi.”
