Nga Boldnews.al
Ose ka një fat dreqi, ose dreqi i korruptuar është brenda tij, saqë çdo shqiptar e të huaj që zgjedh, do i shfaqet në një aferë korruptive. Ky është “fati i keq” i kryeministrit Rama, pas shpinës së të cilit hanë dardha e kumbulla edhe zyrtarët e lartë europianë. Të martën, ish-përfaqësuesja e lartë e BE-së për Politikën e Jashtme dhe Sigurinë dhe nënkryetare e Komisionit Europian, Federica Mogherini, u arrestua në Belgjikë nën dyshimin për afera korruptive.
Ajo ishte dekane e Kolegjit të Europës, një “shkollë politike”, pas së cilës hetuesit zbuluan se fshihej një aferë e pastër korruptive nën drejtimin e Mogeherinit, mikeshës së kryeministrit Rama, ose balonës europiane që i jepte frymëmarrje artificiale kreut të qeverisë kur shpërthenin skandalet e njëpasnjëshme korruptive.
Prokuroria Europiane (EPPO) dyshon se Kolegji i Europës, që ka seli edhe në Shqipëri, e drejtuar nga Mogherini, është përfshirë në një aferë korruptive dhjetëra milionë euro. Hetimet janë në fëzën e parë dhe dyshimet mbetet se këtë aferë e ka shtrirë në çdo vend, aty ku në top listën e vendeve të korruptuara padyshim që është Shqipëria. Me një të rënë kalemit, rreth 20 milionë euro të taksave tona Rama i dha si “pajë” për Mogherinin, ndonëse këtë kolegj e shiti me propagandë si vlerë të madhe.
Për të kuptuar dështimin e një investimi të madh që më shumë se shkollë ngjan si resort, u tha se këtu do mbërrinin studentë nga çdo vend i Europës. Po sa është numri i tyre? Këtë e zbuloi vetë Mogherini e cila vetëm dhjetë ditë më parë vizitoi Shqipërinë dhe mburrej se 46 studentë do ndiqnin kolegjin në Shqipëri.
Dukshëm një aferë çmendurie për të nderuar “mikeshën e kohëve të vështira”. Kjo zonjë, që të martën pa t’i shtrëngoheshin në duar prangat, mbante qeverinë Rama me elozhe, duke shitur një tjetër Shqipëri në BE. Fliste për rëndësinë e reformës në drejtësi, i jepte dekorata honorifike Ramës si nismëtar dhe mbështetës i një drejtësie të re që do të luftonte krimin e organizuar dhe korrupsionin. Po, po, korrupsionin, këtë fjalë që zonja sot e ka akuzë, ndërsa dashnori i drejtësisë së re në Shqipëri është kthyer në dhunues më të madh të saj.
E ngjashme me sjelljen e Mogherinit në raport me Ramën është edhe ajo e komisioneres për zgjerim Marta Kos. Në një qëndrim të saj në vizitën e fundit që pati në Shqipëri pa asnjë dridhje të leshit të qerpikut, deklaroi se: “zgjedhjet e 11 majit ishin të lira dhe ndershme”, paçka se në zyrën e saj ishte raporti i zi i OSBE-ODIHR-it
Drekat, darkat, pritjet e shumta dhe ofiqet që kudërmojë erë korrupsion nuk kanë lënë pa infektuar ndërkombëtarë që jepën pas agjendës së një kryeministri që sot krenohet se është në mandatin e katërt qeverisës, por drejton popullin më emigrant dhe më të varfër në Europë. Kjo mbetet pjesa e dukshme, ndërsa ana e errët e saj, ku fshihen pas hijes njerëzore 1.98 centimetra është korrupsioni. Sa pa fat kryeministri, dreqi i korrupsionit s’po i ndahet!
