Policia italiane ka arrestuar katër shqiptarë, pasi kultivonin marijuanë në një depo të boshatisur në mes të pyllit. Era e marijuanës ishte aq e fortë sa, pavarësisht pyjeve përreth, policia dyshoi dhe filloi të monitoronte depon zyrtarisht të braktisur. Dy javë më vonë, u arrestuan katër shqiptarët dhe u sekuestruan 64 kilogramë marijuanë.
Ngjarja ndodhi në zonën e Pavias, konkretisht midis Varzi-t dhe Santa Margherita di Staffora. Karabinierët arrestuan katër shqiptarë, të cilët tani po mbahen në burgun e Pavias. Të katër shqiptarët akuzohen për posedim të lëndëve narkotike me qëllim trafikimin e tyre.
Mediat italiane shkruajnë se arrestimi i grupit shqiptar ndodhi më 1 dhjetor. Policia ndaloi dy nga të katër personat pranë qytetit të Varzit. Pak më parë, ata kishin ngarkuar 21 qese plot me marijuanë në pjesën e pasme të një furgoni dhe kishin dalë nga depoja.
Në të njëjtën depo, pasi arrestuan dy të parët, oficerët më vonë zbuluan dy bashkëpunëtorët, të cilët u arrestuan gjithashtu. Brenda objektit ndodheshin qindra vazo që përmbanin mbetjet e bimëve të marijuanës. Me sa duket, pajisjet e nevojshme për kultivimin e kanabisit përfshinin plehra, ajrosës dhe llamba. Drogat dhe mjetet u sekuestruan.
