Deputetja e Partisë Demokratike, Jorida Tabaku, në një reagim në rrjetet sociale tha se programi i rindërtimit pas tërmetit të vitit 2019 është kthyer në një “minierë floriri” për qeverinë, ndërsa mijëra familje mbeten pa banesa të përfunduara.
Ajo akuzoi qeverinë se tenderimet u kryen pa fonde në buxhet, duke fshehur kostot reale dhe duke i rritur artificialisht. Si shembull, Tabaku përmendi një shkollë të ndërtuar me fonde të BE-së, që kushtoi rreth 600 mijë euro, ndërsa e njëjta shkollë e ndërtuar me buxhetin e shtetit kushtoi 2.2 milionë euro sipas Bashkisë Tiranë.
Deputetja shtoi se qeveria refuzoi të përdorte fondet më ekonomike dhe transparente të BE-së, duke zgjedhur eurobondet më të shtrenjta, që ngarkojnë shqiptarët me interesa të larta dhe borxh afatgjatë.
Postimi i Tabakut
Gjashtë vite më parë, vendi ynë u godit nga tragjedia e tërmetit që la pa strehë qindra familje dhe krijoi një traumë kolektive të pashlyeshme për të gjithë shqiptarët.
Ajo që duhej të ishte një periudhë e përbashkët rimëkëmbjeje u kthye, për fat të keq, në një oportunitet abuzimi për qeverinë socialiste.
Ndërsa komuniteti ndërkombëtar u mobilizua me grante dhe kredi të buta, qeveria premtoi zgjidhje të shpejta dhe rindërtim brenda pak vitesh. Sot, bilanci është tronditës: kosto të fryra mbi 1.3 miliardë euro dhe mijëra familje ende pa një banesë të përfunduar.
Pse ndodhi kjo?
Sepse qeveria zgjodhi të thyente rregullin bazë të financave publike: u hodh në tenderime pa fonde në buxhet, duke fshehur kostot reale dhe duke i rritur ato artificialisht ditë pas dite. Rezultati ishte absurd:
– Një shkollë e ndërtuar me fondet e BE ka kushtuar rreth 600 mijë euro,
– Ndërsa e njëjta shkollë, e ndërtuar me buxhetin e shtetit, kushtonte 2.2 mln euro sipas Bashkisë Tiranë.
Rindërtimi u kthye në një minierë floriri për qeverinë, ndërsa familjet e prekura u lanë peng i premtimeve të pambajtura.
Për muaj me radhë, qeveria mohoi krizën në financat publike. Derisa u detyrua të pranojë atë që shqiptarët e ndjenë në përditshmëri: 1.3 miliardë euro barrë në buxhet për ndërtime ende të papërfunduara.
Vitet kalojnë, kostoja rritet, dhe mijëra njerëz mbeten ende të pastrehë — ndërsa premtimi i rindërtimit vazhdon të përdoret si refren elektoral i dështimit.
Përse qeveria preferoi të paguante me 1.3 miliardë euro taksat e shqiptarëve dhe jo me fondet e BE?
Për një arsye të thjeshtë: fondet e BE janë më ekonomike, më transparente dhe nuk lejojnë abuzime. Qeveria zgjodhi eurobondet më të shtrenjta, duke i ngarkuar shqiptarët me interesa të larta dhe borxh afatgjatë.
Gjashtë vite pas tragjedisë, e vërteta është e hidhur:
Shqiptarët janë edhe në borxh, edhe ende pa strehë. Tërmeti u kthye në një mundësi për të pasuruar pakicën në pushtet, ndërsa shumica e qytetarëve paguan faturën.
