Ushtria izraelite njoftoi se ka gjetur trupat e nëntë militantëve të Hamasit gjatë operacioneve në rrjetin e tuneleve në zonën lindore të Rafahut, në jug të Gazës. Sipas komunikatës zyrtare, militantët janë “neutralizuar” në infrastrukturën nëntokësore, që Izraeli e cilëson si vatër të aktivitetit të Hamasit.
Forcat izraelite thanë se deri tani mbi 30 luftëtarë të Hamasit që kanë tentuar të largohen përmes tuneleve janë vrarë në këtë sektor. Kërkimet dhe operacionet vazhdojnë edhe gjatë armëpushimit të shpallur më 10 tetor, i arritur nën presionin e SHBA-së.
Ndërkohë, burime diplomatike i thanë AFP-së se vijojnë negociatat për fatin e dhjetëra militantëve të tjerë të bllokuar prej javësh në tunele në zonat e kontrolluara nga ushtria izraelite. Hamasi ka kërkuar ndërhyrjen e vendeve ndërmjetëse për të siguruar një dalje të sigurt për luftëtarët.
Sipas këtyre burimeve, SHBA, Katari, Egjipti dhe Turqia po diskutojnë një kompromis që mund të lejojë zhvendosjen e militantëve pas “vijës së verdhë”, në zona që nuk kontrollohen nga Izraeli, për të shmangur një përshkallëzim të ri të konfliktit.
Hamasi pretendon se 60 deri në 80 luftëtarë të tij ndodhen ende të bllokuar nën Rafah. Izraeli, nga ana tjetër, ka bërë të ditur se kryeministri Benjamin Netanyahu nuk mbështet idenë e ofrimit të një kalimi të sigurt.
