Në kuadër të festave të nëntorit, Ambasada e Shqipërisë në Vjenë organizoi edicionin e tretë të iniciativës “Një urë e quajtur kulturë”.
“Kjo iniciativë synon krijimin e një atmosfere bashkëpunimi midis trupit diplomatik në Vjenë, thellimin e njohurive për njëri-tjetrin dhe përdorimin e artit e kulturës si mjeti më i ngrohtë në ndërtimin e marrëdhënieve mes nesh dhe përmes nesh, duke afruar kështu edhe komunitetet tona në Austri.”– thekson Fate Velaj.
Kësaj radhe, jo pa qëllim, u zgjodh Ambasada e Italisë për zhvillimin e këtij edicioni, një vend tradicionalisht mik dhe partner i përhershem i Shqipërisë.
Velaj tregon se “me synimin për të krijuar “këmbën e mesit” të urës sonë kulturore ftova kryetarë bashkish arbëreshe. Duhet theksuar se Ambasada e Italisë ndodhet në një nga godinat më historike të Vjenës, “Palais Metternich””.
Mbrëmjen e përshëndetën Ambasadori i Italisë, z. Giovanni Pugliese, Ambasadori i Shqipërisë, z. Fate Velaj, si edhe në emër të kryetarëve të bashkive arbëreshe të ardhur enkas për të festuar në Vjenë Ditën e Flamurit dhe këtë aktivitet të veçantë në ambientet e Ambasadës Italiane, z. Ernesto Madeo – Kryetar i Bashkisë San Demetrio Corone.
Në këtë mbrëmje magjike, ku pjesëmarrës ishin nga trupi diplomatik në Vjenë dhe institucionet qendrore austriake, shkëlqyen edhe artistët: Gesu Zefi (soprano), Kosti Deti (piano) dhe Kristi Hifzi (piano).
Mes tingujve të pianos dhe zërit të sopranos, u lexuan pjesë nga letërsia e të dy vendeve. Ambasadori i Italisë, Giovanni Pugliese, lexoi në gjermanisht një fragment nga “Kronikë në gur” e Ismail Kadaresë, Ambasadori i Shqipërisë, z. Fate Velaj, po në gjermanisht, lexoi një pjesë nga romani “La collina del vento” i shkrimtarit të njohur arbëresh Carmine Abate. Pas tij, z. Ernesto Madeo e lexoi të njëjtin fragment në italisht.
