Dëmet nga përmbytjet në disa fshatra të Lezhës janë masive, ndërsa situata në terren vazhdon të jetë kritike. Banorët po përdorin gomone për të lëvizur dhe shpëtuar çfarë u ka mbetur, ndërsa mijëra hektarë tokë janë ende nën ujë.
Drejtuesi politik i PD për qarkun e Lezhës, Agron Gjekmarkaj, shpërndau një video në rrjetet sociale ku shihen banorët duke lëvizur me gomone në pronat e tyre për të shpëtuar sende dhe kafshë shtëpiake.
Në postimin e tij, Gjekmarkaj kritikon mungesën e reagimit konkret të institucioneve dhe thekson se pushteti duket më i interesuar të kontrollojë narrativën e opozitës sesa të ndërmarrë masa reale për komunitetin.
“Në vend të masave të qarta, koordinimit dhe mbështetjes reale për komunitetin, pushteti duket më i interesuar të kontrollojë narrativën e opozitës që denoncon vështirësitë e banorëve, ta sulmojë atë, sesa të kontrollojë situatën.
Kjo qasje e shkëputur nga realiteti vetëm sa e thellon krizën dhe tregon paaftësi për t’u përballur me emergjencat që prekin drejtpërdrejt jetën dhe punën e qytetarëve”, shkruan deputeti i PD, Agron Gjekmarkaj.
