“Rama po kërkon gjilpërën në kashtë“,- kështu ka deklaruar mbrëmjen e sotme analisti Andi Bushati, në lidhje me dërgimin e pezullimit të Belinda Ballukut në Gjykatën Kushtetuese.
Sipas Bushatit, Rama me dërgimin e Ballukut në kushtetuese pretendon se po cënohet imuniteti i deputetit por në fakt vjedhjet e kësaj të fundit janë të shifrave të konsiderueshme dhe një qeveritar me akuza të tilla nuk mund të qëndrojë në detyrë.
Bushati thotë më tej se SPAK sipas tij komandohet nga Rama. Sipas Bushatit, SPAK nuk ka vajtur në Parlament për të kërkuar heqjen e imunitetit të Ballukut, pasi ka patur sinjale të qarta që Rama nuk ka ndërmend ta dorëzojë.
“Kryeministri thotë po më vjedhin kompetencat, po cënohet imuniteti i deputetit, njëri pushtet po ndërhyn te tjetri. Në fakt, për mua kjo është të kërkosh gjilpëren në kashtë. Ky mund të jetë debat midis konstitucionalishtësh. Kur një ministër vjedh, çfarë duhet të bëjë? Duhet të qëndrojë në detyrë? Këtu po quhet grusht shteti kur pezullohet një njeri që dyshohet se ka vjedhur, të cili i kemi parë dhe lexuar mesazhet që bën nga fillimi në fund një tender. Ne këtu hyjmë, mos po i prishin Ramës qeverinë? Ta lënë qeverinë të vjedhin?
Për mua, SPAK-u që të ishte laboratorisht korrekt dhe të bënte process të pasharë, duhet ta çonte për imunitet Ballukun. Çështja që ka zgjedhur për ta kapur veshin kështu… vjen se ka marrë mesazhin nga Rama, që unë Belindën nuk e dorëzoj, nuk ia heq imunitetin, është detyruar të gjejë artificën. Debati nuk është si po vepron SPAK. Puna është ta lëmë gënjimin e publikut se po shkelet Kushtetuta, se po rrëmbehen kompetencat e Edi Ramës, sepse ai ka kompetenca edhe mbi Federatën e Futbollit… Kur secili mbrohet, ne marrim rast pas rasti, ka të drejtë filani mbi kauzën me të cilën po mbrohet. Nëse Veliaj, që për mua është hajdut recidivist si Balluku, mbrohet në GJK dhe thotë mua kryeministri nuk më shkarkon dot, kjo gjë ha diskutim dhe duhet gjykuar. Varet për cfarë shkon”,- tha Bushati në emisionin “Të Paekspozuarit” në MCN TV.
