Mjeku kirurg Fitim Shini, ka treguar si paraqitet gjendja e të miturit i cili u plagos me thikë këtë të mërkurë në qytetin e Durrësit.
Në një prononcim për mediat ai thotë se 15-vjeçari ndodhet në reanimacion, i intubuar dhe se gjendja shëndetësore vijon të mbetet e rëndë.
“Për momentin pacienti ndodhet në reanimacion, i intubuar dhe gjendja vazhdon të jetë e rëndë. Shpresoj që në 24/48 orët e ardhshme gjendja të stabilizohet dhe të dalë nga reanimacioni.
Fëmija erdhi në urgjencë me disa plagë, 4 plagë në rajonin e gjoksit, ku njëra prej tyre depërtonte në zemër dhe ka shkaktuar gjendjen e rënduar.
Aktualisht ka marrë 3 flakone gjak dhe për momentin gjendja vazhdon të jetë e rëndë në reanimacion. Shpresojmë që në orët në vijim situata të përmirësohet“, u shpreh mjeku Fitim Shini.
Ngjarja ndodhi paraditen e sotme në zonën e ish-kënetës në Durrës, ku 15-vjeçari E.B, u plagos rëndë me thikë nga adoleshenti M.K, 14-vjeç. I mituri mbërriti në urgjencë në gjendje kritike, me plagë të shumta ku po merr shërbim mjekësor.
