Reshjet e dendura të shiut kanë rikthyer përmbytjet në disa zona të vendit, duke shkaktuar bllokim rrugësh, dëme në tokat bujqësore dhe ndërprerje të energjisë elektrike. Situata paraqitet problematike në disa qarqe, ku uji ka vënë nën presion argjinaturat dhe ka izoluar fshatra të tërë.
Lezhë – banesat përmbyten nga kanalizimet e bllokuara
Në qytetin e Lezhës, uji hyri në bllokun e banimit “11-Janari” në lagjen “Besëlidhja”, pasi kanalizimet nëntokësore nuk përballuan sasinë e madhe të prurjeve. Banorët raportojnë se niveli i ujit u rrit me shpejtësi, duke shkaktuar dëme në katet e para të banesave dhe bizneseve.
Lushnjë – Semani mban nën ujë 180 hektarë tokë
Në zonën e Lushnjës, Lumi Seman vijon të ketë prurje të larta për shkak të shkarkimeve nga hidrocentrali i Banjës, që sipas të dhënave shkon deri në 250 m³/sekondë. Brenda argjinaturës në Ngurrëz të Vogël, Imshtë dhe Zhelizhan, rreth 180 hektarë tokë bujqësore janë ende të përmbytura. Hidrovorët po punojnë me kapacitet të plotë në Tërbuf, Divjakë, Fier-Shegan, Krutje, Këmishtaj dhe Karavasta.
Kukës – rrëshqitje dherash dhe fshatra pa energji
Në qarkun e Kukësit reshjet vazhdojnë me intensitet, duke shkaktuar rrëshqitje dherash dhe bllokime në disa akse kryesore: Kukës–Qafë Mali, Kukës–Bushtricë–Peshkopi, Kukës–Shishtavec, Kukës–Krumë–Tropojë, si dhe Tropojë–Qafë Morinë.
Disa zona vijojnë të jenë pa energji elektrike, përfshirë Mamëzin, Kolshin, Surroin, Tropojën e Vjetër, Fierzen, Llugajn, Margegajn, Zarishtin dhe Fajzën.
Fushë-Arrëz – probleme të përsëritura me rrëshqitjet
Në Fushë-Arrëz, reshjet kanë sjellë ndërprerje të energjisë në disa fshatra dhe prani dherash e gurësh në rrugët rurale, një situatë që është përsëritur disa herë gjatë ditëve të fundit.
Kolonjë – ndërhyrje emergjente në argjinatura dhe rrugë
Në Bashkinë Kolonjë, është punuar me ekskavator në argjinaturën e përroit të Shtikës dhe Bezhanit, ndërsa në Gostivisht fadromat po pastrojnë dherat e rrëshqitura. Punimet vijojnë edhe në urën e Qinamit, e cila kërkon ndërhyrje urgjente.
Maliq – punime për mbrojtjen e lumit Devoll
Në Maliq, ekipet po punojnë në argjinaturat e lumit Devoll dhe në zonën e urës, ku po stacionohen inertet për të forcuar mbrojtjen. Pas testimit të rrugës, do të nisë edhe transporti i inerteve drejt zonës së çarjes së evidentuar. Aksi Lozhan–Mesmal po pastrohet për të rikthyer lëvizjen drejt katër fshatrave të izoluar: Velçan, Selcë, Mesmal dhe Niçë.
Vlorë – rrëshqitje dherash dhe rrugë të bllokuara
Pranë fshatit Vllahinë, rrëshqitja e dherave bllokoi për orë të tëra qarkullimin, ndërsa mungesa e barrierave mbrojtëse në rrugë ka shtuar rrezikun për drejtuesit e mjeteve. Në fshatin Rromës situata është përsëritur përsëri, pavarësisht protestave të banorëve, të cilët thonë se Bashkia Selenicë nuk ka ndërmarrë asnjë masë.
Rrëshqitje dherash janë regjistruar edhe në aksin Tepelenë–Gjirokastër, në zonën e quajtur “Shkalla e zezë”, duke vështirësuar qarkullimin.
