Një grup që dërgonte para të falsifikuara me postë është goditur nga Policia në Tiranë, ku si rezultat janë arrestuar 4 persona.
Në pranga ranë shtetasit Alesio Brungaj, 19 vjeç, banues në Shkodër, një i mitur 17 vjeç, banues në Tiranë, Serxhio Lala 26 vjeç, banues në Tiranë, dhe Enis Aliaj, 19 vjeç, banues në Tiranë.
Ndërkohë, 19-vjeçari A. P., nga Kruja, është shpallur në kërkim.
Sipas Policisë, grupi është zbuluar pasi dy të mitur S. L., E. A janë kapur në një zyrë postare në Tiranë duke tërhequr 11 pako, të cilat përmbanin kartëmonedha euro të dyshuara të falsifikuara.
Dërgues i tyre ishte Alesio Brungaj, i cili përdorte një emër tregtar të rremë për të maskuar aktivitetin kriminal dhe shpërndarjen e monedhave të falsifikuara.
Materialet i janë dërguar Prokurorisë së Tiranës, ndërsa hetimet vijojnë për zbardhjen e plotë të rrjetit.
