Gjykata e Posaçme ka vendosur datën për seancën e verifikimit të kushteve për masat e caktuara ndaj zv/kryeministres Belinda Balluku.
Seanca është caktuar të mbahet nesër ditë e shtunë, ora 09:00. Sipas raportimeve, për mbajtjen e seancës janë njoftuar SPAK dhe palët në proces.
Në seancë do të jenë edhe dy vartësit e Ballukut, drejtori i KESH, Erald Elezi dhe kreu i ARRSH-së, Gentian Gjyli.
“Ju njoftojmë se pranë Gjykatës së Posaçme të Shkallës së Parë për Korruspionin dhe Krimin e Organizuar me datë 22.11.2025, ora 09:00 do të zhvillohet seanca gjyqësore për marrjen në pyetje dhe verifikimin e kushteve dhe kritereve të caktimit të masës dhe nevojat e sigurimit për të pandehurit Belinda Balluku, Gentian Gjyli dhe Erald Elezi, në kuadër të procedimit penal nr. 136, të vitit 2025, të Prokurorisë së Posaçme kundër Korrupsionit dhe Krimit të Organizuar”,- thuhet në njoftimin e Gjykatës.
Ditën e djeshme gjykata caktoi dy masa sigurie ndaj Ballukut. Pezullimin nga detyra si zv/kryeministre dhe ministre e Energjisë dhe Infrastrukturës si dhe ndalimin e daljes jashtë territorit të Shqipërisë. Ndërsa Erald Elezi dhe Gentian Gjyli u lanë në “arrest shtëpie”.
Numri dy i qeverisë Rama, është marrë zyrtarisht e pandehur nga SPAK, në 31 tetor 2025 dhe akuzohet nga Prokuroria e Posaçme për “shkeljen e barazisë në tendera e ankande publikë” e kryer në bashkëpunim, në procedurën për ndërtimin e Tunelit të Llogarasë.
