Rreth 776 familje kanë mbetur pa energji elektrike në qarkun e Korçës si pasojë e motit të keq që ka pushtuar vendin dy ditët e fundit.
Nga të dhënat e strukturave të emergjencave deri në orën 8:30 të mëngjesit të sotëm përpos mungesës së energjisë, situata në këtë qark aktualisht paraqitet e qetë.
Reshjet sollën prezencë inertesh dhe grumbullime ujërash në disa segmente rrugore, por ARRSH Rajoni Qendër-Lindje njofton se të gjitha akset janë të hapura për qarkullim.
Moti i keq shkaktoi përmbytje të mëdha ditën e djeshme në disa qarqe të vendit. Uji përfshiu toka bujqësore, rrugë dhe banesa, ndërsa shumë familje u evakuuan. Sakaq meteorologët kanë parashikuar se në fundjavë pritet të ketë dhe reshje dëbore.
