Një arsenal armësh dhe minash është gjetur mëngjesin e kësaj të premte në zonën e Niklës në Fushë-Krujë.
Nuk dihet ende në pronësi të kujt janë armët, ndërsa ky arsenal zbulohet vetëm pak ditë pas atentatit të Rinas ku u vra Gilamdno Dani dhe u plagos punonjësi i AMP-së, Mustafa Shaljani (Sheqeri).
Fill pas atentatit autorët dogjën makinën e përdorur në krim në Nikël të Fushë Krujës, prandaj ka dyshime se arsenali mund të ketë lidhje me ngjarjen.
Si ndodhi atentati
Gilmando Dani, 47 vjeç, u vra më 11 nëntor të këtij viti te Rrethrrotullimi i Rinasit, pak pasi kishte mbërritur në Shqipëri nga Barcelona.
Dani ishte bashkë me Muçi Shaljani (Sheqeri) 40 vjeç punonjës i AMP-së (Agjencia e Mbikëqyrjes Policore) dhe pasi zbresin në Rinas ata marrin nga parkimi një mjet tip “Mecedez Benz” ngjyrë të bardhë.
Pak metra pas largimit nga aeroporti, autorët i kanë zënë në pritë dhe kanë hapur zjarr me breshëri plumbash ndaj automjetit, duke shkaktuar vdekjen e Danit dhe plagosjen e Shaljanit, i cili ndodhet aktualisht në spital në gjendje kritike për jetën.
