Një ngjarje e rëndë ka tronditur sot qytetin e Durrësit, ku një 25-vjeçar ka vrarë me thikë të atin në banesën familjare.
Viktima është identifikuar si 69-vjeçari Pjetër Kodheli, ndërsa autori i dyshuar është i biri, Marjan Kodheli. 69-vjeçari ka ndërruar jetë gjatë rrugës për në spital, si pasojë e plagëve të marra.
Nëna tentoi ta ndalonte, por pa sukses
Gjatë momentit të krimit në banesë ka qenë e pranishme edhe nëna e autorit. Ajo ka tentuar të ndalojë të birin dhe ta largojë nga sulmi i dhunshëm ndaj bashkëshortit, por nuk ka mundur ta pengojë. Më pas, e tronditur, ka njoftuar menjëherë policinë për ngjarjen.
Pas krimit, 25-vjeçari është larguar nga banesa dhe është kapur pas rreth dy orësh nga policia në një lokal në pronësi të së motrës, në zonën bregdetare të Shkëmbit të Kavajës.
Sipas raportieme Marjan Kodheli vuante nga probleme të shëndetit mendor dhe më herët kishte shfaqur sjellje agresive.
Njoftimi i policisë:
“Rreth orës 13:00, shtetasi M. K., 25 vjeç, dyshohet me probleme të shëndetit mendor, ka vrarë me mjet prerës (thikë), babanë e tij, shtetasin P. K., 69 vjeç, në banesën e tyre, në fshatin Shkallnur. Shërbimet e Policisë, menjëherë pas njoftimit, kanë shkuar në vendngjarje, kanë rrethuar zonën dhe po kryejnë kontrolle intensive, me qëllim kapjen e 25-vjeçarit. Ndërkohë, grupi hetimor po punon për zbardhjen dhe dokumentimin e rrethanave të rastit..
Kur fëmijët bëhen vrasës të prindërve!
Ngjarja e sotme shton listën e krimeve brenda familjes që janë shënuar kohët e fundit në vend. Ndër vite disa raste të ngjashme janë raportuar në qytete të ndryshme të Shqipërisë, ku konfliktet familjare, shpesh të shoqëruara me probleme të shëndetit mendor apo dhunë të përsëritur, kanë përfunduar në ngjarje të tilla tronditëse.
E fundit ishte ngjarja në Fier ku vetëm 3 muaj më parë vajza e ndihmuar nga nëna vrau babanë e saj, duke e mbytur me një tel. Pasi pranoi krimin në polici vajza tha se e ka varrë të atin sepse ‘i kishte nxirë jetën, nuk i jepte para, dhe ishte fanatik’.
Në Durrës në 2024, tre fëmijët bashkëpunuan për vrasjen dhe zhdukjen e trupit të babait të tyre Pëllumb Meta.
Në shkurt 2024 Ike Sokoli u gjet e vdekur në banesë nga nipi në fshatin Vilë-Bashtovë të Rrogozhinës. 75-vjeçarja humbi jetën nga dhuna fizike e të birit, Ndriçim Sokoli, 35 vjeç, me probleme të shëndetit mendor.
Në vitin 2023, 23-vjeçari Mato Gllucaj organizoi vrasjen e babait të Gjorm të Vlorës, ku në sobën me gaz që e mbanin në oborrin e shtëpisë vendosi eksploziv. Sapo babai Durmish Glluçaj, 56 vjeç, u afrua, djali e shpërtheu lëndën plasëse me mekanizëm elektrik. I riu tha se e vrau të atin e verbër pasi e dhunonte vazhdimisht dhe fillimisht tentoi të fsheh ngjarjen.
Në 2022 Mariglen Muhametaj, 30-vjeç, me probleme të shëndetit mendor, vrau me sende të forta babanë e tij, Qemalin, 73-vjeç, në Greshnicë të Mallakastrës.
Në 2021 Ylber Lezi, 47 vjeç, u vra me sende të forta në shtëpi nga gruaja dhe vajza e tij, Mine Lezi dhe Aida Lezi, 51 dhe 21 vjeçe, në Bulqizë. Lezi ishte përdorues i rregullt i alkoolit, ndërsa gruaja e tij me probleme të shëndetit mendor. Familja jetonin në kushte të mjerueshme ekonomike, ndërsa edhe vajza kishte nisur të shfaqte shenja depresioni.
Në 2020 në Buçimas, pranë qytetit të Pogradecit, 44-vjeçari Olsi Çekiçi, i sëmurë me probleme mendore, pas një konflikt verbal me të ëmën, Firdes Çekiçi, rrëmbeu thikën nga kuzhina dhe e goditur atë. Më pas i preu kokën me kosë dhe ia vari tek porta e shtëpisë me gjakftohtësi. E gjithë ngjarja ka ndodhur në sy të vajzës së mitur të autorit.
Në 2018 Qemal Sela, 26 vjeç, qëlloi me plumba automatiku nënën dhe babanë e tij, Flamur Sela, 55 vjeç, dhe Zeqimete Sela, 50 vjeçe. I riu ishte kthyer një ditë më parë nga Anglia dhe kishte debatuar rëndë me të atin. Dyshimet e hetuesve u lidhën me shkakun se ai nuk kishte sjell para nga jashtë. Në grindje djali u kërkoi llogari prindërve për 2 prona që kishte blerë më herët.
Në 2017 burrë e grua, Ali e Jenie Nika u gjetën të vdekur në derën e shtëpisë në Durrës. Vrasës i të dyve ishte djali Leo Nika, 29 vjeç, i cili pas një debati qëlloi drejt tyre me çifte. Ngjarja në atë kohë dyshohej se ndodhi për shkak të problemeve psikologjike dhe me pijen që kishte i riu.
Në 2016 Ardit Zenelhoxha, 30 vjeç, mbyti me duar nënën e tij Hedije Zenelhoxha, brenda në shtëpi në lagjen “Çlirimi” të Elbasanit. I riu sipas policisë, vuante prej kohësh nga depresioni dhe ishte në vështirësi ekonomike.
LEXO EDHE:
Zbardhet vrasja e Anest Ramës/ E bija e mbyti me të dashurin 55-vjeçar (Dinamika)
Vranë babanë e tyre, kërkohet burg përjetë për djalin e madh, 35 vjet për dy fëmijët e tjerë
