Analisti politik Andi Bushati ka deklaruar se protesta në mbështetje të ish-krerëve të Ushtrisë Çlirimtare të Kosovës, të cilët po gjykohen në Hagë, rrezikon të kthehet në një bumerang politik.
Gjatë një interviste në Syri tv, Bushati theksoi se nëse ky tubim përdoret për politikat meskine të ditës, i bën më shumë dëm ish-drejtuesve të UÇK-së që ndodhen në Hagë.
“Katër ish-komandantët e UÇK-së, është botërisht e ditur që kanë 5 vjet që janë Hagë, po e vërtetë, dhe në politikë nuk ka rastësia. Çdo njeri pyet, pse po bëhet tani, me çfarë përkon kjo protestë tani. Përkon një me balotazhin në Kosovë, që çuditërisht në përgjigjen e vet edhe Edi Rama nuk e anashkalonte. Po ta shikoni me kujdes, thoshte Vetëvendosja më sulmon mua për efekte elektoral, e çonte vetë atje, gati-gati ka një efekt elektoral.” – tha Bushati.
Sipas analistit, protesta ka edhe një dimension tjetër që lidhet me zhvillimet politike në Maqedoninë e Veriut.
“Së dyti, në Maqedoni, Ali Ahmeti, njëra nga forcat konkurruese sot, në Maqedoni ishte prezent aty, edhe në Maqedoni jemi në prag të një gare politike të zgjedhjeve lokale. Pra, në këtë kuptim, mos ky është një dirigjim nga Tirana për t’i dhënë një krah që ju keni dhe Tiranën me vete, ne jemi të unifikuar bashkë me forcat që Edi Rama do të kenë më shumë fuqi në Maqedoni dhe në Prishtinë.”
Në përfundim, Bushati nënvizoi se përdorimi i çështjes së ish-krerëve të UÇK-së për interesa të momentit politik do të ishte i dëmshëm.
“Në qoftë se është kështu, se ne kemi vetëm deduksion, nuk kemi prova, por në qoftë se është kështu, përdorimi i atyre që janë në burg për qëllime politike të ditës do të ishte një gjë e vogël, meskine dhe që i bën dëm shumë atyre që janë në Hagë.”
