Gjykata e Posaçme kundër Korrupsionit dhe Krimit të Organizuar (GJKKO) ka nisur sot shqyrtimin e kërkesës së ish-ministrit të Mjedisit, Lefter Koka, për shuarjen e masës së sigurisë “arrest në burg”, e vendosur ndaj tij në kuadër të hetimeve për çështjen e inceneratorit të Fierit.
Seanca gjyqësore u zhvillua nën drejtimin e gjyqtarit të posaçëm Erion Bani, i cili vendosi shtyrjen e saj për në datën 20 tetor.
Sipas vendimit të gjykatës, kërkohet që Gjykata e Lartë të dërgojë disa procesverbale që lidhen me vendimet për pezullimin e afateve të paraburgimit, me qëllim që çështja të shqyrtohet në mënyrë të plotë.
Koka, i cili ndodhet në paraburgim prej më shumë se dy vitesh, akuzohet nga Prokuroria e Posaçme (SPAK) për një sërë veprash penale të lidhura me korrupsionin dhe abuzimin me detyrën, në procesin e dhënies së koncesionit për ndërtimin dhe menaxhimin e inceneratorit të Fierit.
Në lidhje me këtë dosje, Gjykata e Shkallës së Parë kishte shpallur fajtorë disa prej të pandehurve, mes tyre edhe Kokën, por Gjykata e Apelit për Korrupsionin e ktheu çështjen për rigjykim. Aktualisht, dosja ndodhet në Gjykatën e Lartë, pas rekursit të paraqitur nga të pandehurit, dhe pritet të shqyrtohet në dhomë këshillimi më 21 tetor.
