Gjykata e Shkallës së Parë të Fierit ka vendosur masën e sigurisë “arrest me burg” për 38-vjeçarin Milasin Ramaj, i cili u arrestua nga policia pasi kishte kthyer banesën e tij në lagjen “Kastriot” në një bazë armësh dhe municionesh.
Ramaj u vu në pranga gjatë një operacioni të befasishëm në qendër të Fierit, pas informacioneve të siguruara nga një emision investigativ, që kishte komunikuar me të dhe kishte bërë të ditur se ai posedonte një armë zjarri pa leje.
Pas këtij sinjalizimi, strukturat hetimore dhe operacionale të Policisë së Fierit organizuan një aksion për ta ndaluar 38-vjeçarin. Ai u lokalizua teksa lëvizte me automjet, ku gjatë kontrollit iu gjet dhe sekuestrua një armë zjarri tip pistoletë, e mbajtur pa leje, si edhe një shumë prej 3500 eurosh.
Hetimet e mëtejshme çuan në zbulimin e një banese që Ramaj e përdorte si depo armësh. Nga kontrolli në këtë ambient, policia sekuestroi një arsenal të tërë armësh dhe pajisjesh ushtarake, përfshirë: 10 armë zjarri automatike, 1 armë zjarri tip pistoletë, 1 armë zjarri pistoletë automatike, 2 silenciatorë, 9 karikatorë automatiku, 3 karikatorë pushke, 2 krehra pistoletash si dhe sasi të konsiderueshme fishekësh të kalibrave të ndryshëm.
Dyshohet se Ramaj i tregtonte armët dhe pjesët e tyre për grupe kriminale brenda dhe jashtë qytetit të Fierit.
Në bashkëpunim me Prokurorinë e Fierit, policia po vijon punën për identifikimin e personave të tjerë të përfshirë në këtë veprimtari kriminale që lidhet me trafikun e armëve.
