Gjykata Kushtetuese ka regjistruar padinë e ish-kryetares së Këshillit të Lartë Gjyqësor, Naureda Llagami, kundër vendimit të Mbledhjes së Gjyqtarëve të Gjykatës së Lartë, të drejtuar nga Sokol Sadushi.
Në një short të zhvilluar paraditen e kësaj të Marte (14 Tetor 2025), Gjykata Kushtetuese caktoi edhe relatorin e çështjes, i cili është Gent Ibrahimi.
Në fillim të Tetorit, anëtarët e Gjykatës së Lartë vendosën që të dërgojnë emrin e kolegut të tyre, Asim Vokshi, si kandidati fitues për një vend vakant në Gjykatën Kushtetuese.
Kandidatja Naureda Llagami mori shumicën e votave, tetë të tilla. Por ajo nuk arriti të shpallej fituese, sepse nuk arriti kuorumin e nevojshëm prej 9 votash. Diferencën në atë votim e bëri një votë për Llagamin, e cila u shpall e pavlefshme.
Llagami e kundërshtoi vendimin e Mbledhjes së Gjyqtarëve të Lartë pranë Gjykatës Administrative të Apelit, ku kërkoi sigurimin e padisë, që do të thoshte pezullim i procedurave të dekretimit të Asim Vokshit, deri në shqyrtimin e çështjes në themel.
Gjyqtarja administrative, Semiramis Hoxhalli, konstatoi të hënën e kësaj jave se rasti ishte kompetencë shqyrtimi nga Gjykata Kushtetuese.
Menjëherë pas atij vendimi, kandidatja humbëse, Naureda Llagami, iu drejtua me një kërkesë Kushtetueses, në të cilën përsëriten kërkesat për pezullimin e procedurës deri në shqyrtimin e çështjes në themel.
Tashmë, pritet që Gjykata Kushtetuese të vendosë për hapat e mëtejshëm për vlerësimin e padisë së Llagamit.
Lexo edhe:
