Kreu i Zyrës Federale për Mbrojtjen e Kushtetutës në Gjermani, Sinan Selen, ka paralajmëruar për një kërcënim serioz nga Hamasi në territorin gjerman dhe në vendet e tjera të Evropës.
Duke folur sot para Bundestagut, Selen tha se pavarësisht zhvillimeve diplomatike dhe negociatave të mundshme për paqe në Lindjen e Mesme, “rreziku i sulmeve terroriste mbetet real dhe i lartë”.
Sipas të dhënave që ai paraqiti, aktualisht në Gjermani jetojnë rreth 32,500 persona të lidhur me rrethin e Hamasit, një shifër që është rritur me 6% krahasuar me vitin 2024.
Selen e përshkroi Gjermaninë si një “zonë strehimi dhe infrastrukture për Hamasin”, duke shtuar se grupi militant palestinez e sheh vendin si “teatër të mundshëm operacioni”.
Ai kujtoi gjithashtu arrestimin e fundit të tre anëtarëve të Hamasit, të cilët dyshohen se planifikonin sulme kundër institucioneve dhe bizneseve hebraike në territorin gjerman.
Sipas mediave gjermane, autoritetet e sigurisë janë në gatishmëri të lartë, ndërsa janë intensifikuar masat e mbrojtjes rreth komuniteteve hebraike dhe objekteve diplomatike në disa qytete të mëdha të vendit.
