“Sapo folëm sërish me presidentin e Shteteve të Bashkuara, për herë të dytë brenda 2 ditëve. Edhe biseda e sotme ishte shumë produktive”, shkruan presidenti ukrainas Volodymyr Zelensky në një postim në rrjetet sociale sot, 12 tetor.
“Ishte dakorduar dje një seri temash për t’u diskutuar sot, dhe kemi përfshirë të gjitha aspektet e situatës: mbrojtjen e jetës në vendin tonë, forcimin e kapaciteteve në mbrojtjen ajrore, rezistencë dhe kapacitete afatgjata. Po ashtu, kemi diskutuar shumë detaje lidhur me sektorin energjetik”, shton kreu i shtetit ukrainas, duke theksuar se Donald Trump është i mirëinformuar për gjithçka që po ndodh.
Ai gjithashtu konfirmon se të dy palët “janë dakord për të vazhduar dialogun” dhe se ekipet e tyre po “bëjnë përgatitjet për të ardhmen”.
Sipas asaj që raporton Axios, dje, 11 tetor, liderët diskutuan mundësinë që Washingtoni t’i sigurojë Kievit raketat me rreze të gjatë Tomahawk, një çështje mbi të cilën Trump po shqyrton një vendim.
Po ashtu, pritet një vizitë javën e ardhshme në Washington e një delegacioni ukrainas të nivelit të lartë, të udhëhequr nga shefi i kabinetit të Zelensky-t, Andriy Yermak, dhe kryeministrja Yulia Svyrydenko.
Në anën tjetër, Dmitry Peskov nga Kremlini, ka deklaruar për gazetarin e televizionit shtetëror rus Pavel Zarubin se mundësia që SHBA-të të furnizojnë Ukrainën me raketa Tomahawk është një çështje “me shqetësim të jashtëzakonshëm”.
“Tani është vërtet një moment shumë dramatik, pasi tensionet po intensifikohen nga të gjitha anët”, shtoi Peskov.
Axios raporton se ky temë është diskutuar gjatë bisedës telefonike mes presidentëve Trump dhe Zelensky dje.
