Vendimi i presidentit amerikan Donald Trump për të vendosur trupa të Gardës Kombëtare në qytete të drejtuara nga demokratët, kundër dëshirës së zyrtarëve lokalë, do të përballet të enjten me dy prova të rëndësishme ligjore.
Seancat gjyqësore do të nisin në Portland, Oregon dhe Chicago, Illinois, ku drejtuesit vendorë kanë paditur qeverinë, duke pretenduar se përdorimi i ushtrisë amerikane në rrugët civile është antikushtetues.
Shtëpia e Bardhë e ka mbrojtur vendimin për vendosjen e trupave, me zëdhënësen Karoline Leavitt që deklaroi: “Kemi besim të plotë në autoritetin ligjor të presidentit për ta bërë këtë.”
Trump më parë ka dërguar Gardën Kombëtare edhe në Los Angeles dhe Washington DC, duke argumentuar se trupat ishin të nevojshme për të goditur emigracionin e paligjshëm dhe krimin.
Ai ka deklaruar gjithashtu se Garda Kombëtare është e domosdoshme për të mbrojtur oficerët federalë të emigracionit gjatë operacioneve të dëbimit.
Në Portland, protestat para një ndërtese të Agjencisë për Emigracion dhe Dogana (ICE) janë bërë gjithnjë e më të tensionuara, duke u përshkruar nga banorët si një “zonë lufte”.
Pasi Trump urdhëroi vendosjen e 200 pjesëtarëve të Gardës Kombëtare të Oregonit në shtator, një gjyqtar bllokoi përkohësisht këtë lëvizje. Kur më pas Trump kërcënoi të dërgonte pjesëtarë nga një shtet tjetër, gjykata zgjeroi urdhrin për ta bllokuar edhe këtë veprim.
Të enjten, një panel prej tre gjyqtarësh në Gjykatën e Apelit të Qarkut të Nëntë do të dëgjojë argumentet për të vendosur nëse do të heqin përkohësisht bllokimin e urdhrit të gjykatës më të ulët për ndalimin e përdorimit të Gardës së Oregonit.
Zëdhënësja e Shtëpisë së Bardhë, Abigail Jackson, tha të mërkurën për NBC News: “Administrata Trump është e përkushtuar të rivendosë rendin dhe ligjin në qytetet amerikane të prekura nga dhuna për shkak të keqmenaxhimit të demokratëve. Dhe presidenti Trump nuk do të qëndrojë duarkryq ndërsa protestues të dhunshëm sulmojnë oficerët federalë të zbatimit të ligjit.”
Por Guvernatorja e Oregonit, Tina Kotek, një demokrate, tha: “Nuk ka asnjë kryengritje në Portland, as ndonjë kërcënim ndaj sigurisë kombëtare.”
Ndërkohë, gjykatësja federale April Perry në Illinois do të dëgjojë të enjten argumentet mbi përpjekjen e qeverisë për të dërguar Gardën Kombëtare në Chicago.
Ky qytet ka qenë një pikë e nxehtë në përpjekjet e administratës Trump për të ndaluar dhe dëbuar emigrantët pa dokumente, me raportime se agjentët federalë kanë zbritur nga helikopterë “Black Hawk” gjatë një operacioni dhe kanë përdorur gazra irritues kundër protestuesve paqësorë.
Gjatë një proteste, një grua u qëllua me armë nga një agjent federal. Që atëherë, qindra trupa të Gardës Kombëtare të Teksasit janë vendosur në atë zonë.
Padia e zyrtarëve të Illinois-it argumenton se përpjekjet e administratës Trump janë jo vetëm të paligjshme, por edhe një përpjekje për të krijuar krizë artificiale duke nxitur trazira civile.
Kryetari i Bashkisë së Çikagos, Brandon Johnson, tha për BBC: “Të zgjedhësh njerëz të Gardës Kombëtare nga një shtet tjetër, nga Teksasi, dhe t’i dërgosh në Illinois, kjo është e paligjshme, antikushtetuese dhe e rrezikshme.”
/BBC
