Gazetari Basir Çollaku, në një intervistë për Syri Tv, ngriti alarmin për përfshirjen e thellë të Shqipërisë në rrjetet ndërkombëtare të trafikut të drogës, duke akuzuar qeverinë shqiptare si pjesë e një strukture kriminale me bazë institucionale.
Ai deklaroi se rrjetet shqiptare të trafikut të drogës kanë shtrirje nga Amerika Latine deri në SHBA dhe Evropë, me Portin e Durrësit si një pikë kyçe e këtij trafiku, krahas portit të Antwerp-it në Belgjikë.
Sipas tij, DEA amerikane ka mbledhur prova të shumta për këtë aktivitet, duke operuar prej tre vitesh me një zyrë në Tiranë. Çollaku theksoi se nuk bëhet fjalë për thashetheme mediatike, por për të dhëna konkrete që tregojnë për pastrim të parave, lidhje të forta me kartelet dhe një fuqi ekonomike kriminale që ka depërtuar në institucionet shtetërore shqiptare.
Deklarata:
“Unë jam i bindur për këtë, nuk është thjesht një tendencë për të zhurmuar me një artikull ose me disa të dhëna. Historia e lidhjes së shoqërisë shqiptare me kartelet e drogës nuk është më sekret.
Ajo ka kapërcyer kufijtë e Shqipërisë prej vitesh, i ka kapërcyer jo thjesht si lajm por me tendencën e aktivitetit të ushtruar, e parasë së pastruar, e lidhjeve të forta dhe fuqisë së madhe ekonomike të krijuar. Pra, ne kemi një fuqi narkotike që quhet qeveria shqiptare.
Pra, këto efekte, ky zhvillim le të themi negativ në drejtim të ligjit, kanë kapërcyer kufijtë e Shqipërisë e kanë mbërritur në Amerikën Latine. Janë kartelet e kokainës ku elementët e botës së trafikut të Shqipërisë kanë lidhjet e fuqishme përveç furnizimit atje dhe shpërndarjes në Evropë, por janë grupet që kanë akses në këtë botë të paligjshmërisë me aktivitetin e tyre jo vetëm në Amerikën Latine por edhe atje ku këto grupe kanë aktivitet në SHBA.
Dalja e kësaj fuqie në këtë treg me këtë agresivitet, ashpërsi dhe sasi marramendëse parash duke qarkulluar, duke pastruar dhe duke pasur një bërthamë institucionale e cila të forcon dhe të jep leje të pastrosh, e natyrisht e ka përfshirë qeverinë shqiptare dhe sigurisht kryeministrin Rama në këtë lupë të investigimit amerikan. Ata kanë të dhëna të shumta.
DEA ka gati prej tre vitesh me një zyrë në Tiranë dhe nuk ka nevojë të marrë thashetheme askund. Ata kanë prova, kanë fakte. Dihet që Porti i Durrësit është një port i dhënë me qira tek grupet kriminale dhe kjo është e mjaftueshme. Një konkurrent i fortë është porti në Belgjikë, janë dy porte ku qarkullojnë tonelata kokainë ku bëjnë miliarda euro. Dhe këto miliarda pastrohen diku.”
