Kreu i Prokurorisë së Posaçme (SPAK), Altin Dumani, zhvilloi sot një vizitë ngushëllimi në familjen e gjyqtarit Astrit Kalaja, i cili u vra një ditë më parë në sallën e Gjykatës së Apelit në Tiranë, teksa ishte në krye të detyrës.
Ngjarja e rëndë ndodhi pas shpalljes së vendimit për një çështje gjyqësore, kur autori Elvis Shkëmbi nxori armën dhe qëlloi për vdekje gjyqtarin Kalaja. Më pas, ai plagosi edhe dy persona të tjerë, babë e bir, Rakip dhe Ervis Kurtaj. Hetimet tregojnë se autori kishte kaluar përmes skanerit i armatosur, por roja i sigurisë nuk ndërhyri, duke mos kryer asnjë kontroll fizik. Përveç autorit, janë arrestuar edhe xhaxhai i tij Gjon Shkëmbi dhe punonjësi i sigurisë, Banush Koxhaj.
Homazhet shtetërore për gjyqtarin e ndjerë do të zhvillohen nesër në Pallatin e Kongreseve.
