Celibashi raporton për zgjedhjet/ PS propozim të ri për Reformën Zgjedhore: S’ka më arsye të grumbullohen në KZAZ

Oerd Bylykbashi ngriti shqetësimin për një dështim me votën e diasporës në zgjedhjet e 11 Majit.

“Me votën e Diasporës shënuat një dështim katastrofik”, tha Bylykbashi.

Votimin nga jashtë, Celibashi e konsideroi si sukses teksa tha se “nuk dua që të sfidoj kënd, kur them se votimi nga jashtë ishte një sukses. Me gjithë problematikat. Sa i përket funksionimit të KQZ.”.

Ndërsa socialisti Damian Gjiknuri u angazhua për ndërhyrje ligjore në financimin e partive politike.

“Partitë para zgjedhjeve mbërrijnë si kërpudhat. Do të ndërhymë në kodin e ri zgjedhor”, u shpreh Gjiknuri.

Ky propozim i socialistëve vjen një ditë pasi kreu i grupit parlamentar, Taulant Balla tha se maxhoranca do të ndërmarrë nismën për ngritjen sa më shpejt të komisionit për reformën zgjedhore.

Ulsi Manja tha se tani nuk ka më arsye që numërimi të bëhet në KZAZ.

“Duhet të adresohet shpejt procesi i numërimit të votave. Nëse do t’i kthehemi numërimit në qendrat e votimit është krejtësisht e mundur që edhe rezultati në Shqipëri do të dalë në një kohë rekord jo më shumë se 2 orë pasi mbyllet votimi. Shkaqet që na çuan te parashikimi i Kodit për numërimin e votave në qendra numërimi ka rënë. Ishin shkaqe dhe faktorë të tjerë atëherë që partitë e ndërmorën këtë veprim, që kishin të bënin me garantimin e procesit, shmangien e konflikteve në qendrat e votimit”, u shpreh Manja.

Sipas tij “Sot janë mbi 5 mijë qendra votimi, është krejtësisht e mundur që teknologjinë që e kemi të përqendruar në qendrat e grumbullimit të votave, ta shpërndajmë në gjithë Shqipërinë dhe ta bëjmë numërimin sapo mbyllet votimi. Ka ardhur koha të kalojmë te administrimi civil i procesit zgjedhor”.