Një shqiptar 44-vjeçar u ekzekutua sot në qytetin e Medelinit në Kolumbi.
Mediat e këtij vendi raportojnë se bëhet fjalë për shqiptarin Artur Tushi, i cili kishte edhe nënshtetësi ekuadoriane.
Krimi ndodhi në mes të ditës, në një zonë ekskluzive të qytetit, shumë pranë një qendre tregtare.
Sipas medieve, Artur Tushi po shkonte tek apartamenti i tij kur u qëllua nga një person që më pas u arratis me një motoçikletë të fuqishme.
Fakti që Tushi ishte pranë apartamentit, sugjeron se vrasësi me pagesë i dinte lëvizjet e tij.
Sipas portaleve kolumbiane, shqiptari u godit disa herë, ndërsa në trup ka të paktën 11 plumba, kryesisht në gjoks dhe në anë.
Një grua, që fillimisht u raportua se ishte me Tushin, u plagos. Mediat thonë se ajo ishte një kalimtare e rastësishme dhe aktualisht gjendet në spital në gjendje stabël.
Autori i krimit, që sipas medieve ishte një vrasës me pagesë, u arrestua më vonë. Ai është një 35-vjeçar nga Venezuela.
Mediat raportojnë se ai u arrestua me shpejtësi për shkak të sistemit të kamerave që është vendosur në qytet.
Policia gjeti edhe armën e krimit. Mësohet se autori i krimit ishte i njohur për policinë pasi kishte rekorde kriminale për plagosje dhe posedim droge.
