Florenca Zeqo denoncon në emisionin “Stop” në Tv Klan se prokurorja Esmeralda Basho i ka sekuestruar padrejtësisht makinën, një BMW X5 me vlerë 20 mijë euro që prej dy vitesh, pa qenë pjesë e ndonjë procedure penale ndaj saj.
Gjykata ka nxjerrë urdhër të prerë për kthimin e mjetit që prej tre muajsh, por prokurorja Basho refuzon ta kthejë makinën dhe mban peng automjetin duke u nxjerrë pretendime të rreme.
Denoncuesja Florenca Zeqo: Po, po dhe bëra shumë kërkesa për makinën.
Gazetarja: Çfarë makine është? Ka një kosto të konsiderueshme?
Denoncuesja Florenca Zeqo: Është BMW X5 E 2004-ës. Unë e kisha makinë të mirë dhe ishte në gjendje të mirë se punoja transport në Mikonos. Ma mbajtën makinën mua, më shkatërruan nga ekonomia, tamam më shkatëruan nga të gjitha anët.
Këtu në Greqi paguaj taksa të makinës dhe unë atë makinë, d.m.th. e paguaja 840 euro në fund të vitit, ajo mua që atë vit më vajti 2-fish, sivjet po prapë më vajti 2-fish, çdo vit d.m.th, që kalon, më shkon 2-fish taksa, pa pasur makinën dhe u thashë “të paktën më jepni targat e makinës, ta heq nga emri im”, po s’u hoq nga emri im. Ajo vazhdon të jetë gjithmonë në qoftë se unë nuk dorëzoj targat në Greqi. Paguaj një makinë të cilën nuk e kam.
Gjatë verifikimeve në pikën e sekuestrimit në Sarandë, policia konfirmon se nuk ka marrë asnjë urdhër për kthimin e makinës.
Prokurorja Esmeralda Basho: Mjeti nuk mund të konfiskohet në këtë situatë meqenëse rezulton që është në pronësi të një personi që nuk rezulton të jetë në cilësinë e të pandehurit në procesin penal me të cilin është sekuestruar, kështu që unë pranoj kërkesën.
Gjyqtari i çështjes: Avokat, përfundimisht?
Avokati Arben Llangozi: Mendoj, që kërkesa është e mirëargumentuar. I kërkojmë gjykatës pranimin e saj, sipas objektit!
Gjyqtari i çështjes: Prokurore?
Prokurorja Esmeralda Basho: Pranimin e kërkesës!
Gjyqtari i çështjes: Do të tërhiqet gjykata për marrjen e vendimit.
Kur “Stop” pyet Bashon se pse e mban makinën të bllokuar, ajo gënjen duke thënë se ka nxjerrë urdhrin e zhbllokimit. /Tv Klan
