Gjykata e Lartë ka zgjedhur sot Asim Vokshin si anëtar të ri të Gjykatës Kushtetuese, duke plotësuar vendin bosh të lënë nga Holta Zaçaj. Në bazë të renditjes së KED, anëtarët e tjerë që ishin në garë për këtë vakancë ishin Naureda Llagami dhe Florjan Ballhysa.
Rezultatet e votimit
Në përfundim të votimit, komisioni konstatoi:
Asim Vokshi – 6 vota
Naureda Llagami – 8 vota
Florian Ballhysa – 0 vota
Gjithashtu u gjet një fletë votimi e pavlefshme.
Ligji përcakton se fitues shpallet kandidati që merr 3/5 e votave të pjesëmarrësve. Në rastin e sotëm, asnjë kandidat nuk arriti këtë prag. Për këtë arsye, komisioni shpalli fitues kandidatin e renditur të parin nga Këshilli i Emërimeve në Drejtësi (KED), çka i dha fitoren Asim Vokshit.
Më 17 shtator 2025, Këshilli i Emërimeve në Drejtësi (KED) zhvilloi një mbledhje maratonë, ku mbylli procesin e verifikimit dhe vlerësimit të kandidaturave.
Sipas renditjes, anëtari i Gjykatës së Lartë Asim Vokshi i cili sot u zgjodh si i kryetar i Gjykatës Kushtetuese kryesoi listën me 89.5 pikë. Pas tij u rendit Naureda Llagami, ish-kryetare e Këshillit të Lartë Gjyqësor, e cila mori 89.3 pikë, me një diferencë minimale nga Vokshi. Në vendin e tretë u pozicionua ish-Komisioneri Publik në procesin e vettingut, Florian Ballhysa, me 77.83 pikë.
Më tej, në listë u renditën edhe:
Alma Faskaj, ish-komisionere e Vettingut – 77.77 pikë,
Genta Bungo Tafa, ish-drejtuesja e KPK-së – 75.44 pikë,
Alban Toro, ish-anëtar i Këshillit të Lartë Gjyqësor – 74.22 pikë.
Manovrat e Sadushit
Prej disa muajsh, kryetari i Gjykatës së Lartë, Sokol Sadushi, ka përdorur mandatin e tij njëvjeçar si kryetar i Këshillit të Emërimeve në Drejtësi (KED) për të përshpejtuar dhe kontrolluar procesin e verifikimit të kandidatëve për Gjykatën Kushtetuese. Sipas raportimeve, qëllimi i tij ka qenë të kapë tre mandate kushtetuese brenda një kohe të shkurtër, duke përfshirë vendin e kryetares Holta Zaçaj dhe dy gjyqtarëve të tjerë.
Për të realizuar këtë, Sadushi planifikoi mbledhje të KED-it edhe gjatë pushimeve zyrtare të gushtit, duke kërkuar që anëtarët të ndërpresin pushimet dhe të jenë të pranishëm për të përfunduar verifikimin e kandidatëve. Një prej kandidatëve kryesorë, Denar Biba, u detyrua të dorëzojë sqarime shtesë mbi pasurinë, duke e vonuar procesin dhe duke shtuar tensionin brenda KED-it.
Këto veprime tregojnë për një strategji të qëllimshme të Sadushit për të nxitur dhe influencuar procesin, duke siguruar që përzgjedhja e kandidatëve, përfshirë Asim Vokshin, të zhvillohej sipas linjës që ai kishte parashikuar.
