Diplomati Agim Nesho, i ftuar në emisionin ‘Syri Digjital’ në SYRI TV, ka komentuar lidhjet mes kryeministrit Edi Rama dhe fondacionit të George Soros, duke theksuar se marrëdhënia me Aleks Soros, birin e miliarderit, është e ngushtë dhe e afishuar hapur në publik.
Sipas Neshos, një nga shembujt më të qartë të veprimtarisë së organizatës së Soros është pikërisht bashkëpunimi i Aleks Soros me Edi Ramën.
‘Një nga rastet par-ekselencë të veprimtarisë së organizatës së Soros, është bashkëpunimi i Aleks Soros me kryeministrin e Shqipërisë, Edi Rama. Veprimtaria nuk fshihet fare, por në mënyrë të hapur sfidohet dhe SHBA.
Kemi patur raste që në mënyrë të përsëritur, Rama ka shprehur se, me vëllain e tij Aleks Soros është në një dashuri të përjetshme, ka marrë pjesë në dasmën e tij, ku ka qenë edhe promotor i një fjalimit ku pak lider edhe të SHBA-së kanë guxuar të flasin.,’ u shpreh Nesho.
Diplomati theksoi më tej se kryeministri Rama është pozicionuar hapur si kundërshtar i administratës së ish-presidentit amerikan Donald Trump.
‘Ky ka marrë rolin edhe një të kundërshtari të administratës Trump, dmth që ky nuk pyet.
Nuk pyet sepse mendon se është i siguruar nga paratë e korruptuara nga mbështetja që i jep krimi i organizuar, por akoma si një njeri që nuk percepton forcën e SHBA’.
Duke analizuar më tej ndikimin e fondacionit Soros në vend, Nesho u shpreh se, Rama e ktheu Shqipërinë në një vend për eksperimente.
‘Ky karshillëk ka bazë reale, sepse Shqipëria ka qenë një platformë eksperimentale nga Soros, sidomos për të aplikuar drejtësinë, për ta bërë një armë në dorë të pushtetit politik.’, u shpreh diplomati.
