Aksionet e kompanisë Lithium Americas pësuan një rritje të fortë, pas interesit të administratës Trump për të blerë një pjesëmarrje aksionare në këtë kompani minerare me qendër në Vankuver, Kanada.
Sipas agjencisë Reuters, Shtëpia e Bardhë e ka propozuar këtë pjesëmarrje në kohën kur Lithium Americas është duke rinegociuar kushtet e një huaje prej 2.2 miliardë dollarësh të dhënë nga Departamenti i Energjisë për minierën e Thacker Pass.
Lëvizja e Shtëpisë së Bardhë
Lajmi bëri që vlera e aksioneve të kompanisë të rritet me afro 80%. Kjo është lëvizja më e fundit nga Shtëpia e Bardhë për të siguruar kontroll të drejtpërdrejtë mbi zinxhirët e furnizimit me minerale të rëndësishme për interesat kombëtare amerikane, por për herë të parë kjo përfshin një kompani kanadeze. Projekti në fjalë synon të ndihmojë SHBA-të të reduktojnë varësinë nga Kina.
Pas investimeve në Intel dhe MP Materials, Trump po vazhdon politikën e të ashtuquajturit kapitalizëm politik, duke i larguar SHBA-të nga modeli tradicional i tregut të lirë dhe duke u afruar më shumë me modelin evropian të kapitalizmit të shtetit. Deri më tani, qeveria amerikane është bërë aksionere në Intel (me 9.9% të aksioneve) dhe ka investuar në MP Materials, kompania që menaxhon të vetmen minierë të metaleve të rralla në SHBA.
Projekti i litiumit në Nevada
Sipas CNBC-së, Lithium Americas zotëron 62% të projektit dhe menaxhon minierën e Thacker Pass në veri të Nevadës, e cila pritet të bëhet një nga burimet më të mëdha të litiumit në Amerikën e Veriut. Faza e parë e projektit pritet të jetë funksionale deri në fund të vitit 2027. Litiumi është një përbërës kyç për prodhimin e baterive të automjeteve elektrike.
Projekti është një bashkëpunim mes Lithium Americas dhe General Motors, e cila ka 38% të aksioneve dhe ka rënë dakord të blejë prodhimin e minierës kur ajo të jetë operative.
Përparësia kineze
Ndërsa burimet e litiumit janë shpërndarë në mënyrë të barabartë globalisht, Kina ka siguruar dominimin në procesin e rafinimit dhe nxjerrjes, duke marrë nën kontroll shumë koncesione në Afrikë dhe Amerikën Latine. Kinezët janë përpara jo vetëm në aspektin minerar, por edhe në ndërtimin e infrastrukturës.
Industria elektrokimike në ngritje
Si rezultat i investimeve të mëdha kineze, industria elektrokimike është më e zhvilluar se ajo kimiko-petrolifere. Në treg ka më shumë bateri sesa motorë me djegie të brendshme. Po zhvillohen edhe alternativa të reja për zëvendësimin e litiumit, përfshirë mundësinë e nxjerrjes së tij nga uji i detit.
Vitet e fundit është ndezur një garë e fortë për litium në Argjentinë dhe në Kili. Sipërmarrës italianë që kanë siguruar një koncesion në kufirin me Perunë, pohojnë (nën anonimat) për përfitime të jashtëzakonshme, ku blerësit kinezë dhe japonezë janë të gatshëm të ofrojnë çmime gjithnjë e më të larta.
Qeveria japoneze po përpiqet të reagojë, për të mbrojtur zinxhirin e saj të avancuar të prodhimit të automjeteve.
Investimet e reja të Kinës
Këtë javë, kompania kineze Xinjiang Xihai Lithium (e njohur më parë si Zhicun Lithium) njoftoi fillimin e fazës së parë të një impianti të ri për prodhimin e karbonatit të litiumit në rajonin Xinjiang të Kinës. Faza e parë e impiantit ka një kapacitet vjetor prej 30 mijë tonësh, por autoritetet lokale thonë se ai do të arrijë deri në 300 mijë tonë në kapacitet të plotë.
Kompania ka planifikuar të investojë rreth 4.6 miliardë yuan (rreth 647 milionë dollarë) në këtë projekt. “Zhvillimi i shpejtë i sektorëve të tranzicionit energjetik, veçanërisht automjeteve elektrike dhe sistemeve të ruajtjes së energjisë, ka shtyrë kompanitë të investojnë në projekte të reja,” thuhet në një njoftim zyrtar, por edhe paralajmërohet për një ofertë pak më të lartë sesa kërkesa aktuale.
Riciklimi dhe perspektiva afatgjatë
Jemi në fazën e katërt të revolucionit industrial, ku riciklimi merr një rëndësi gjithnjë e më të madhe. Çdo pajisje elektronike përmban një bateri dhe çdo bateri përmban një përqindje litiumi. Fillimi i proceseve të riciklimit do të thoshte varësi më e vogël nga importet.
Litiumi, ndryshe nga nafta, është më pak ndotës dhe mund të rikuperohet, gjë që e bën zinxhirin e furnizimit më të qëndrueshëm në një ekonomi që synon energji të pastër.
