Tre vajza të reja janë torturuar, përdhunuar dhe më pas janë vrarë nga një bandë droge në Argjentinë. Mediat e huaja raportojnë se e gjithë ngjarja e rëndë është transmetuar live në Instagram, ku besohet se e kanë ndjekur rreth 45 persona.
Ministri i Sigurisë së Buenos Airesit, Javier Alonso, ka konfirmuar se trupat e pajetë të Brenda del Castillo, Morena Verdi dhe Lara Gutiérrez, të cilat ishin raportuar të zhdukura të premten, janë gjetur të groposura në oborrin e një shtëpie në një zonë periferike të kryeqytetit.
Sipas hetimeve paraprake, tre vajzat dyshohet se janë mashtruar nga autorët për të shkuar në atë banesë, si të ftuara për një “festë”.
“Ato janë parë për herë të fundit duke hipur në një automjet me dëshirë, pasi ishin ftuar në një aktivitet. Nuk e dinin se po binin në kurthin e ngritur nga një rrjet ndërkombëtar i trafikut të drogës, i cili kishte planifikuar t’i vriste”, tha ministri Alonso.
Ai shtoi se skena e torturës është transmetuar drejtpërdrejt në një grup të mbyllur në Instagram, duke theksuar se ishte një transmetim live dhe jo një video e regjistruar.
“Rrjeti kriminal qëndron pas këtij akti mizor dhe e kishte vendosur të kryente vrasjet pikërisht në atë shtëpi, në jug të Buenos Airesit,” shtoi ai.
Ministria për Gratë dhe Diversitetin në Buenos Aires e ka cilësuar ngjarjen si një akt femicidi, forma më ekstreme e dhunës me bazë gjinore.
Në një deklaratë zyrtare thuhet: Në kontekstin e krimit të organizuar dhe trafikimit të drogës, kjo ngjarje përfaqëson një shprehje të egër të çnjerëzimit, mizorisë dhe neglizhencës. Jemi pranë familjeve dhe të afërmve të viktimave në këtë moment të rëndë.
Të rejat ishin parë për herë të fundit të premten në mbrëmje, në pamje të kamerave të sigurisë që i tregonin duke hipur në një furgon të bardhë. Trupat e tyre u gjetën në të njëjtën shtëpi ku për herë të fundit ishte sinjalizuar prania e telefonave të tyre.
Automjeti i djegur është gjetur rreth 100 metra larg shtëpisë, në një zonë të braktisur. Policia ka arrestuar deri tani katër persona në lidhje me këtë krim.
