Departamenti i Tregtisë njoftoi se Prodhimi i Brendshëm Bruto (PBB) është rritur me një normë vjetore prej 3.8% në periudhën prill-qershor. Kjo është dukshëm më e lartë se vlerësimi i mëparshëm prej 3.3% dhe shumë mbi parashikimin fillestar prej 3%.
Rritja më e madhe erdhi kryesisht falë shpenzimeve të konsumatorëve, të cilat u rritën me 2.5%, krahasuar me 1.6% në vlerësimin e dytë. Analistët e konsiderojnë këtë diferencë si të pazakontë, duke e lidhur me të dhëna të paqëndrueshme dhe pasiguri të larta ekonomike gjatë vitit 2025.
Rimëkëmbja e tremujorit të dytë u mbështet nga rënia e importeve dhe shpenzimet e forta të amerikanëve, ndonëse ekonomia kishte shënuar tkurrje në fillim të vitit për shkak të stokimit të importeve përpara tarifave të reja të vendosura nga presidenti Donald Trump.
Rezerva Federale e Atlantës parashikon se edhe tremujori i tretë ka qenë i fortë, me një rritje të pritshme prej 3.3%, ndërsa shifra zyrtare pritet të publikohet muajin e ardhshëm.
Megjithatë, sfida mbetet tregu i punës, i cili po ngadalësohet, dhe ndjenja e konsumatorëve që po bie. Sidoqoftë, amerikanët nuk i kanë ulur ende shpenzimet: shitjet me pakicë u rritën me 0.6% në gusht, duke vijuar të mbeten një shtyllë e fortë e ekonomisë.
Nga ana tjetër, Departamenti i Tregtisë raportoi një rritje të fortë të porosive për mallra të qëndrueshme me 2.9% në gusht, kryesisht për avionë dhe pjesë këmbimi, ndërsa investimet e bizneseve shënuan rritje më modeste.
Ekspertët theksojnë se, pavarësisht pasigurive dhe tregut të punës më të brishtë, ekonomia amerikane mbetet e qëndrueshme dhe nuk është në rrezik recesioni./CNN
