Ish-deputetja e LSI-së, Silva Caka, një ndër personat më të besuar të Ilir Metës, u emërua ditën e sotme nga Edi Rama në postin e zëvendësministres së Brendshme.
Ajo kaloi papritur “ylberin”, pasi ka patur vazhdimisht qëndrime mjaft të forta, në kufijtë e fyerjeve, ndaj Edi Ramës dhe qeverisë së tij.
Ky nuk është rasti i parë, kur eksponentët të LSI-së apo PD-së, “rekrutohen” nga Edi Rama, pasi ka patur dhe raste të tjera në të kaluarën dhe për ta e ka patur një koment edhe Silva Caka.
Në një emision televiziv, Caka ka thënë se ndaj atyre që janë rekrutuar nga Rama, më pas janë ngritur akuza nga drejtësia dhe sipas saj, Edi Rama merr të përshtatshmit e vet. Ajo ka thënë se “të shiturit” gjejnë veten tek kryeministri dhe tek aferat korruptive të tij.
“Prandaj ç’të them… të gjithë emrat që janë larguar dikur nga ai që sot i ka rekrutuar, janë akuzuar. Kështu që mbase ka marrë të përshtatshmit e vet, kanë gjetur veten aty me Edi Ramën, me të gjitha ato aferat e tij korruptive. Unë mendoj që thjesht, andej nga anët e mia i thonë që ka gjetur tenxherja kapakun. U rrotullua kapaku, shkoi dhe gjeti tenxheren e vet.” – deklaronte dikur Silva Caka.
Silva Caka ka deklaruar vazhdimisht se Edi Rama është pengesa kryesore për integrimin e Shqipërisë në Bashkimin Europian. Tashmë zonja Caka, do të bashkëpunojë ngushtë me “sociopatin me kartelë” në qeverinë e cila ka shpallur si synim pikërisht integrimin e vendit në BE brenda vitit 2030.
