Një ngjarje e rëndë është regjistruar mbrëmjen e kësaj të mërkure, në qytetin e Durrësit, ku një person është gjetur pa shenja jete në banesën e tij.
Viktima është shtetasi Valbon Beqiraj, rreth 51-vjeç, i cili jetonte në një apartament në katin e katërt të një pallati në lagjen nr.12 të qytetit bregdetar.
Burime bëjnë me dije se nga kqyrja e trupit të viktimës janë konstatuara plagë, të dyshuara të shkaktuara me mjet prerës, ku dyshohet se është qëlluar me thikë. Beqiraj është gjetur pa shenja jete nga nipi i tij, i cili ka njoftuar më pas Policinë.
Mësohet se nga hetimet paraprake dhe nga kqyrja e kamerave të sigurisë, grupi hetimor ka identifikuar autorin e dyshuar të vrasjes dhe janë vënë në ndjekje të tij.
Nuk dihet nëse kemi të bëjmë me një vrasje me qëllim grabitjen, apo me një akt makabër pas një konflikti të çastit.
Në vendin e ngjarjes ndodhet policia që ka bërë rrethimin e zonës dhe ka nisur hetimet për zbardhjen e dinamikës dhe motiveve të krimit.
Ende nuk ka një komunikatë nga ana e Policisë së Durrësit lidhur me ngjarjen kriminale në fjalë.
PAMJET NGA VENDI I NGJARJES
