Analisti Ilir Kalemaj, i ftuar në në Ora News, komentoi zhvillimet e fundit lidhur me shkarkimin e kryebashkiakut të Tiranës, Erion Veliaj, duke e cilësuar fundin e karrierës së tij politike si “pa lavdi”.
“Është fundi pa lavdi i një personazhi. Nëse Veliaj ka marrë përsipër edhe kusure që nuk ishin të tijat, nga lejet e ndërtimit deri tek inceneratorët, ku sot shpenzohen 90 mijë euro në ditë nga qytetarët e Tiranës, ndonëse aty nuk është hedhur ende lopata e parë, kjo nuk e ndryshon faktin që rruga e tij politike është pa krye,” – tha Kalemaj.
Ai solli në vëmendje edhe raste të tjera në politikën shqiptare, duke theksuar standardet e dyfishta në raport me funksionarët e zgjedhur lokalë.
“Ne kemi pasur rastin e një kryetari bashkie si Fredi Beleri, i cili qëndroi një vit në burg dhe vazhdonte të ishte kryetar bashkie i pashkarkuar. Por nëse ka vullnet të liderit suprem, gjenden gjithmonë artificat për t’i bërë gjërat në kohë rekord,” – shtoi analisti.
Kalemaj theksoi se Veliaj është detyruar të “gëlltisë” edhe sulmet personale ndaj tij, përfshirë edhe deklarata ekstreme për “varjen e tij”, që sipas tij ndodhën në mënyrë metaforike.
Në përfundim, ai e cilësoi të pamundur rikthimin e Veliajt në politikë:
“Pak rëndësi ka nëse kufoma politike e Veliajt do tentojë ringjalljen apo do kalojë tek të shumtët. Politkisht, rruga e tij ka marrë fund.”
