Nga Boldnews.al
Gara e zhvilluar nga Këshilli i Emërimeve në Drejtësi për të vlerësuar kandidatët që aplikonin për të plotësuar vakancën e krijuar në Gjykatën Kushtetuese nga përfundimi i mandatit të gjyqtares dhe njëkohësisht kryetares, Holta Zaçaj, është shoqëruar me dyshime të forta publike se po kontrollohej në mënyrë “okulte” nga kryetari i Gjykatës së Lartë, Sokol Sadushi.
Faza përfundimtare e këtij procesi, pikëzimi i gjashtë kandidatëve të kualifikuar, i jep një element më shumë këtij dyshimi publik.
Në janar 2025, Gjykata e Lartë, si organ emërtese, shpalli thirrjen për aplikime për postin vakant në Gjykatën Kushtetuese.
Lista e kandidatëve iu përcoll për verifikim Këshillit të Emërimeve në Drejtësi (KED), i cili, përgjatë vitit 2025, drejtohet nga Sokol Sadushi, i cili është njëkohësisht edhe kryetari i Gjykatës së Lartë, institucioni i cili do të emërojë gjyqtarin kushtetues.
Mesnatën e së Mërkurës së kësaj jave (17 Shtator 2025), Këshilli i Emërimeve në Drejtësi vendosi vlerësimin me pikë të kandidatëve Asim Vokshi, Naureda Llagami, Florian Ballhysa, Alma Faskaj, Genta Bungo Tafa dhe Alban Toro.
Vota “vendimtare” e Sadushit
Dokumentat zyrtare tregojnë se renditja e pikëve për kandidatët është “diktuar” tërësisht nga Sokol Sadushi, i cili mban edhe postin e kryetarit të Këshillit të Emërimeve në Drejtësi për vitin 2025.
Të paktën dy nga tre kandidatët që janë në krye të listës, gjenden aty falë pikëve që kanë marrë pikërisht nga Sokol Sadushi.
Asim Vokshi, gjyqtar në Gjykatën e Lartë, vartës i Sadushit, është renditur kandidati me më shumë pikë në garën për të plotësuar vakancën e Holta Zaçaj.
Sipas proces-verbalit të pikëzimit, kandidati Vokshi ka marrë në total 89.5 pikë. Nga 9 anëtarët e KED-it, rezulton se Sokol Sadushi i ka dhënë pikët më të larta, plot 93.5 pikë. Në rastin e Asim Vokshit ka edhe një detaj interesant-ai ka marrë vlerësimin më të ulët në “Ekspertizën në fushën e të drejtës”, një kriter që, si rregull, ai duhet ta kishte shumë lart, përsa kohë është anëtar i Gjykatës së Lartë dhe kandidati kryesor për në Gjykatën Kushtetuese.
Në vijim, pikët e Sokol Sadushit kanë qenë vendimtare për të përfshirë në “top listë” edhe kandidatin tjetër, Florian Ballhysa. Ish-Komisioneri Publik i Vetingut ka “bindur” kryetarin e Gjykatës së Lartë që ta vlerësojë më shumë se të gjithë anëtarët e tjerë të Këshillit të Emërimeve në Drejtësi.
Sokol Sadushi i ka dhënë kandidatit Ballhysa 90 pikë. Ky vlerësim i ka shërbyer Ballhysës që të rregullojë më së miri mesataren, e cila i ulej shumë nga pikëzimi që i dha një tjetër anëtar i KED-it, vetëm 59 pikë.
Votim në “konflikt interesi”
Kryetari i Këshillit të Emërimit në Drejtësi (KED), Sokol Sadushi, i ka dhënë pikët më të larta edhe kandidatit tjetër, Alban Toro. Ky është një vlerësim që, megjithëse nuk ka dhënë peshë në rastin e Toros, krijon dyshime për konflikt interesi.
Alban Toro ka qenë anëtar i Këshillit të Lartë Gjyqësor, kur Sokol Sadushi kandidoi për një pozicion në Gjykatën e Lartë, në vitin 2020.
Po ashtu, një tjetër situatë me sfond konflikti interesi është shfaqur gjatë procesit të pikëzimit të kandidatëve për postin vakant në Gjykatën Kushtetuese.
Aplikantja Genta Bungo Tafa, e renditur e pesta në listën përfundimtare, është vlerësuar me pikët më të larta nga anëtari i KED-it, prokurori i Apelit, Etjen Kapo.
Genta Bungo është vlerësuar me 75.44 pikë. Ndërkohë, anëtari Kapo e ka vlerësuar atë me plot 91 pikë, shumë më shumë se kolegët e tjerë të Këshillit të Emërimeve në Drejtësi.
Kandidatja Genta Bungo Tafa ka qenë anëtarë dhe, për një periudhë kohe, edhe kryetare e Komisionit të Pavarur të Kualifikimit (Vetingut).
Ajo rezulton se ka qenë kryesuese e trupës së Vetingut për prokurorin dhe, njëkoësisht, anëtarin e Këshillit të Emërimeve në Drejtësi, Etjen Kapo.
Me vendimin e datës 13 Maj 2022, trupa e Komisionit të Pavarur të Kualifikimit, e përbërë nga kryetare Genta Bungo Tafa, relatore Valbona Sanxhaktari dhe anëtar Lulzim Hamitaj, ka vendosur “Konfirmimin në detyrë të subjektit të rivlerësimit Etien Kapo, prokuror në Prokurorinë pranë Gjykatës së Apelit Durrës”.
Pikët për kandidatët
Këshilli i Emërimeve në Drejtësi njoftoi mëngjesin e 18 Shtatorit përfundimin e procesit të pikëzimit për kandidatët për vakancën në Gjykatën Kushtetuese.
Sipas Këshillit, “pas shqyrtimit të gjithanshëm të dokumentacionit të paraqitur nga vetë kandidatët dhe atij të siguruar nga ky Këshill, si dhe komunikimit me institucionet e tjera lidhur me të dhënat e nevojshme për vlerësimin e kandidaturave”, bën publike rezultatin e vlerësimit dhe pikëzimit të kandidatëve, sipas kësaj renditje:
- Asim Vokshi 89.5 pikë;
- Naureda Llagami 89.3 pikë;
- Florian Ballhysa 77.83 pikë;
- Alma Faskaj 77.77 pikë;
- Genta Tafa (Bungo) 75.44 pikë;
- Alban Toro 74.22 pikë.
Në vijim, Këshilli i Emërimeve në Drejtësi thotë se “do të miratojë edhe Raportin e arsyetuar për procedurën e verifikimit, të vlerësimit dhe pikëzimit të secilit kandidat dhe të renditjes përfundimtare të tyre, me qëllim dërgimin e tij më pas te organi i emërtesës, Gjykata e Lartë”.
LEXO EDHE:
