Komisioni Qendror i Zgjedhjeve ka shpërndarë një fond prej 12.7 milionë lekësh (127 mln lekë të vjetra) si kompensim financiar paszgjedhor për katër parti politike që morën pjesë në zgjedhjet parlamentare të 11 majit 2025 dhe që nuk kishin përfituar fonde publike përpara fushatës.
Përfituesit janë: Lëvizja Bashkë, Lëvizja Shqipëria Bëhet, Partia Mundësia dhe Partia Koalicioni Euroatlantik. Sipas përllogaritjeve të KQZ-së, kompensimi ndahet si më poshtë:
- Lëvizja Bashkë – 2.3 milionë lekë,
- Lëvizja Shqipëria Bëhet – 3.8 milionë lekë,
- Partia Mundësia – 4.6 milionë lekë,
- Koalicioni Euroatlantik – 1.9 milionë lekë.
Kriteri kryesor për të përfituar kompensim ishte kalimi i pragut prej 1% të votave të vlefshme në rang kombëtar. Vlera e një vote të vlefshme është llogaritur në 94 lekë, sipas vendimit të KQZ-së.
“Qëllimi i këtij projektvendimi është kompensimi financiar paszgjedhor për ato subjekte zgjedhore të cilat nuk kanë përfituar nga shpërndarja e fondeve si paradhënie partive pjesëmarrëse në zgjedhjet për Organet e Qeverisjes Vendore, të datës 14 maj 2023 dhe kanë marrë jo më pak se 1 përqind të votave të vlefshme në shkallë vendi bazuar në rezultatin përfundimtar të zgjedhjeve.”, thuhet në vendimin e KQZ-së.
Ndërsa partitë që kishin përfituar fonde paradhënie për fushatën, nuk përfshihen në këtë shpërndarje.
Në rastin e koalicionit “Nisma Shqipëria Bëhet”, kompensimi i jepet vetëm partisë Lëvizja Shqipëria Bëhet të Adriatik Lapajt, pasi partia e Endri Shabanit, Nisma Thurje kishte përfituar fonde përpara zgjedhjeve. KQZ sqaroi se kompensimi u llogarit mbi bazën e votave që secila parti mori në mënyrë individuale brenda koalicionit.
Në dokument thuhet gjithashtu se Fondi i vënë në dispozicion nga buxheti i shtetit për financimin e fushatës zgjedhore të partive politike pjesëmarrëse në zgjedhjet e datës 11 Maj 2025 ishte 150 milionë lekë. Referuar vendimit nr. 292, datë 21.3.2025, të Komisionerit Shtetëror të Zgjedhjeve, “Për përcaktimin e sasisë së fondit nga Buxheti i Shtetit që do t’u shpërndahet partive politike pjesëmarrëse në zgjedhjet për Kuvend, të datës 11 Maj 2025”, partitë politike të regjistruara si subjekte zgjedhore që kanë përfituar fonde paradhënie të akorduara nga Buxheti i Shtetit në zgjedhjet e datës 11 Maj 2025, janë si më poshtë:
- Partia Demokratike – 44 milionë e 818 mijë e 545 lekë.
- Partia Republikane – 2 milionë e 689 mijë e 112 lekë.
- Partia “Lëvizja për Zhvillim Kombëtar” – 896 mijë e 370 lekë.
- Partia “Socialiste e Shqipërisë” – 65 milionë e 291 mijë e 390 lekë.
- Partia e Lirisë – 9 milionë e 140 mijë e 730 lekë.
- Partia “Drejtësi, Integrim dhe Unitet” –1 milionë e 792 mijë e 735 lekë.
- Partia “Bashkimi për të Drejtat e Njeriut” – 896 mijë e 370 lekë.
- Partia “Agrare Ambjentaliste e Shqipërisë” – 896 mijë e 370 lekë.
- Partia “Lëvizja e Legalitetit” – 896 mijë e 370 lekë.
- Partia Socialdemokrate – 3 milionë e 15 mijë e 375 lekë.
- Partia “Nisma Thurje” – 868 mijë e 445 lekë.
/Tv Klan
