Gjatë një aktiviteti kulturor të mbajtur me rastin e botimit të librit “Industria e Holokaustit” të Norman Finckelstein, publicisti Fatos Lubonja kritikoi kryeministrin Edi Rama për mënyrën se si sipas tij, po përdor myslimanët shqiptarë për interesa politike.
Sipas Lubonjës, edhe pse Shqipëria ka shumicë myslimane, qëndrimet e fundit të qeverisë në raport me konfliktin në Lindjen e Mesme, tregojnë një kurs të afërt me Izraelin, duke përmendur abstenimin e Tiranës në votimin e rezolutës për Palestinën në OKB.
“Ne këtu kemi një mazhorancë myslimane, pra dhe këtu duhet të kishte një lloj ndjeshmërie. Mirëpo pyetja që ngrihet është që paradoksalisht si ka mundësi që gjithë këta myslimanë këtu, ky nuk paska frikë fare se nesër pasnesër këta mund ta dënojnë, mund ta ndëshkojnë me votë. Kanë ndjeshmëri këta myslimanët apo s’kanë fare për çfarë ndodh në Palestinë? Kjo do të thotë “mysliman washing”, që ti përdorë myslimanët për të shplarë fytyrën time për ato që po bëj. Dhe lidhjet e tij janë shumë të qarta.”
Për Lubonjën, lajmi për hapjen e një muzeu të artit islam, u përdor për të qetësuar reagimet e komunitetit mysliman për heshtjen ndaj asaj që po ndodh në Gazë.
Ndërsa studiuesi Gerd Demneri, citoi përgjatë aktivitetit, se në libër Finkelstein shkruan se kujtesa e Holokustit është shndërruar në një industri politike që përdoret për të mbrojtur Izraelin.
Ndërsa përkthyesi Rudian Yekthi foli për një gjenocid të qartë sipas tij, që po ndodh në Gaza.
Finkelstein thotë se Holokausti nuk duhet të përdoret si një instrument politik, por të kujtohet si një tragjedi njerëzore që kërkon drejtësi e reflektim./MCN
