Google DeepMind ka njoftuar një arritje të konsideruar si “historike” në zhvillimin e Inteligjencës Artificiale, duke e krahasuar me momentet ikonike kur kompjuteri Deep Blue mposhti Garry Kasparovin në vitin 1997 dhe kur një IA triumfoi për herë të parë ndaj një kampioni në lojën Go në vitin 2016.
Versioni më i fundit i modelit Gemini 2.5 AI arriti të zgjidhte një problem tepër kompleks të botës reale në një konkurs ndërkombëtar programimi të mbajtur këtë muaj në Azerbajxhan, duke fituar medalje ari dhe duke u bërë modeli i parë i IA që arrin një sukses të tillë.
Detyra konsistonte në përllogaritjen e mënyrës më efikase për të shpërndarë një lëng në një rrjet të ndërlidhur kanalesh dhe rezervuarësh, çka kërkonte eksplorimin e një numri të pafund mundësish. Ndërsa programuesit më të mirë nga Rusia, Kina e Japonia nuk ia dolën, Gemini 2.5 e zgjidhi brenda më pak se gjysmë ore.
Në total, modeli u rendit i dyti mes 139 programuesve më të fortë universitarë në botë, duke performuar “po aq mirë sa një nga 20 koduesit më të mirë globalisht”, sipas Google.
“Kjo është një hap gjigant drejt Inteligjencës së Përgjithshme Artificiale (AGI), pasi kërkon arsyetim abstrakt, kreativitet dhe aftësi për të sintetizuar zgjidhje të reja ndaj problemeve të panjohura më parë”, theksoi kompania.
