Një tjetër ditë gjakderdhjeje është shënuar në Rripin e Gazës, ku mbi 106 persona kanë humbur jetën si pasojë e një operacioni të gjerë ushtarak të nisur nga Izraeli.
Sipas burimeve spitalore të cituara nga Al Jazeera, vetëm në Qytetin e Gazës janë vrarë 79 persona, pasi mbrëmjen e kaluar Forcat Mbrojtëse të Izraelit (IDF) nisën një ofensivë tokësore të përshkallëzuar, me përfshirjen e dhjetëra mijëra trupave.
“Po nisim një sulm të fuqishëm kundër fortesës së Hamasit në Qytetin e Gazës. Gjatë 24 orëve të fundit, trupat nga Divizioni i 98-të kanë filluar operacione tokësore në qytetin qendror të Gazës,” deklaroi IDF.
Operacioni është shoqëruar nga mbështetje e fuqishme ajrore dhe detare, ku sipas ushtrisë izraelite janë goditur dhjetëra “vende terroriste”, përfshirë objekte ushtarake, poste vëzhgimi dhe ndërtesa të mbushura me mina që, sipas tyre, ishin përgatitur për të dëmtuar trupat në terren.
