Deputeti i Partisë Demokratike, Belind Këlliçi, ka reaguar sot në Kuvend kundër ndryshimeve të propozuara në rregulloren e Parlamentit, duke i bërë thirrje mazhorancës që të krijojë një komision të posaçëm për hetimin e lidhjeve të politikës me krimin e organizuar.
Në fjalën e tij, Këlliçi theksoi se ndryshimi i rregullores për çështje të tjera, ndërkohë që temat kyçe si lufta kundër krimit të organizuar po shmangen, është një shkak i fortë për të kundërshtuar propozimin.
Deputeti ironizoi duke shtuar se një komision i tillë duhej të ishte njëpartiak dhe të kishte si qëllim zbardhjen e lidhjeve të politikanëve me kartellet dhe grupet kriminale në qarqe të ndryshme.
“Unë e kam të pamundur të votoj për ndryshimin e rregullores për aq kohë sa nuk shoh një komision të domosdoshëm për marrëdhëniet me kartelet e drogës dhe grupet kriminale. Ky komision duhet të jetë njëpartiak dhe të zbulojë të vërtetat që lidhen me përfaqësuesit politikë të lidhur me bandat në qarqet Elbasan, Durrës, Shkodër dhe Tiranë”, u shpreh Këlliçi.
