Policia britanike ka bërë të ditur se është duke u përgatitur për “gati çdo skenar të parashikueshëm”, përpara vizitës zyrtare të presidentit amerikan Donald Trump, që pritet të mbërrijë nesër në Mbretërinë e Bashkuar.
Vizita konsiderohet historike, pasi është hera e dytë që Trump zhvillon një vizitë shtetërore në Britani.
Ajo do të nisë të mërkurën me një pritje madhështore nga familja mbretërore, përfshirë një shëtitje me karrocë dhe një darkë zyrtare luksoze në Kalanë e Uindsorit, një nga rezidencat më të vjetra dhe më prestigjioze të monarkisë britanike.
“Bëhet fjalë për një operacion sigurie dhe policor të shkallës së lartë, ashtu siç pritet në raste të tilla,” deklaroi Christian Bunt, zëvendësdrejtori i Policisë së Luginës së Tamizit.
Gjatë qëndrimit të tij, Trump do të pritet edhe nga kryeministri britanik Keir Starmer të enjten në rezidencën qeveritare të Chequers, një takim që do të zhvillohet me karakter privat.
Vizita vjen në një moment delikat për politikën amerikane, pas vrasjes së javës së kaluar të aktivistit të djathtë Charlie Kirk, një mbështetës i afërt i Trump. Kjo ngjarje ka ngritur shqetësime për një rritje të mundshme të dhunës politike në SHBA, ndërsa efektet e saj janë ndjerë edhe në protokollet e sigurisë jashtë vendit.
I pyetur nëse kjo ngjarje ka ndikuar në masat e sigurisë për vizitën në Britani, zyrtari policor Bunt u shpreh se planet e sigurisë janë në rishikim të vazhdueshëm.
“Jam i kënaqur që kemi përgatitur një plan shumë gjithëpërfshirës të sigurisë, që merr parasysh gati çdo mundësi të asaj që mund të ndodhë,” theksoi ai.
