“U infektova me hepatit C, humba 12 kilogramë në 4 muaj.”
Italiani Davide Pecorelli, i cili ndodhet i burgosur në Shqipëri ku po vuan dënimin për inskenimin e vdekjes së tij, i është drejtuar me një letër senatorit Walter Verini, sekretar i Komitetit të Drejtësisë të Senatit italian dhe një figurë kyçe në Partinë Demokratike Kombëtare, teksa i këkron ndihmë.
Në letrën e tij të gjatë, publikuar nga mediat italiane, Pecorelli pretendon se po mbahet padrejtësisht në burgun më të ashpër dhe më famëkeq të Shqipërisë, “Burg 313”, dhe ndan një qeli të vogël me shtatë persona të tjerë, duke jetuar në kushte të tmerrshme sanitare.
Pecorelli më pas i bën një apel të fortë senatorit.
“Ju kërkoj të merrni parasysh dëshirën time të fundit: të hedhim dritë, duke përdorur të gjitha mjetet në dispozicionin tuaj, mbi çështjen ligjore në të cilën jam i përfshirë dhe, në veçanti, mbi seancën e fundit që do të mbahet më 18 shtator 2025, në orën 18:00, në Gjykatën e Apelit të Tiranës”, shkruan ai.
Pas apelit të tij, ka reaguar Verini.
“Davide Pecorelli, nga burgu shqiptar ku po mbahet, i dërgoi medias një letër të hapur drejtuar mua, si dhe Ministrit të Punëve të Jashtme dhe autoriteteve diplomatike italiane në Shqipëri. Ne shpresojmë që mbrojtja e tij penale do të çojë në një rezultat që do të kapërcejë regjimin e tij të burgut”, shprehet Verini.
Siç dihet, në mars, Ministri i Drejtësisë Carlo Nordio dha ekstradimin e Pecorellit në Shqipëri bazuar në një urdhër arresti të lëshuar nga Gjykata e Pukës për krimet e mashtrimit (ose përvetësimit), përdhosjes së varreve, pengimit të drejtësisë dhe sekuestrimit të pronës me zjarrvënie, të kryera në janar 2021 në Shqipëri.
Ai është dënuar me 4 vite burgim nga Gjykata e Shkodrës. Më 8 maj, shtetasi italian nga San Giustino u transferua në burgun e Tiranës në pritje të një seance dëgjimore të Apelit, e cila do të mbahet më 18 shtator.
Pecorelli inskenoi vdekjen e tij në Janar të vitit 2021 në Pukë. Makina e tij u gjet e shkrumbuar në fshatin Gjegjan dhe brenda saj u gjetën edhe eshtra, duke bërë fillimisht që të mendohej se i përkisnin pikërisht biznesmenit. Por, ai u gjet i gjallë më 17 shtator 2021, në ishullin Montecristo (Itali). Ai u shpëtua në det, teksa lundronte me një varkë të vogël. E kur zbriti në tokë, u përball me urdhërarrestin e lëshuar nga gjykata shqiptare, më 2 tetor të 2022.
Rasti i Davide Pecorelli-t në fakt për shumë kohë ishte i mbushur me intrigë. Me origjinë nga San Giustino, sipërmarrësi në sektorin e produkteve të bukurisë dhe ish-arbitër, ishte vendosur në vendin tonë, aty ku fillimisht u mendua se ishte karbonizuar.
Më pas u rishfaq në Itali, në ujërat e detit Tirreno. Tregoi një histori si nëpër libra, duke thënë se kishte qenë në kërkim të një thesari. Në fakt, sipas asaj që doli në hetimet e autoriteteve shqiptare, në Janar të 2024-s, ai i vuri flakën makinës që kishte marrë me qira në Shqipëri dhe brenda saj vendosi eshtra për të simuluar vdekjen e tij. E gjithë ngjarja u inskenua për shkak të borxheve, të cilat e çuan të ndërmerrte këto veprime.
