Kina ka nisur këtë të dielë, më 14 shtator, bisedimet tregtare me zyrtarët e Shteteve të Bashkuara në Madrid, sipas mediave shtetërore kineze dhe qeverisë spanjolle.
Sekretari i Thesarit të SHBA-ve, Scott Bessent, dhe zyrtarë të lartë kinezë, përfshirë zëvendëskryeministrin He Lifeng, do të diskutojnë mbi çështje ekonomike dhe tregtare, si dhe mbi konfliktin në lidhje me TikTok-un, kanë konfirmuar të dyja palët.
“Delegacionet kineze dhe amerikane u takuan të dielën në Madrid për bisedime mbi çështje ekonomike dhe tregtare,” raportoi agjencia zyrtare kineze Xinhua nga kryeqyteti spanjoll.
Zyrtarët kinezë kanë bërë të ditur se delegacioni i tyre do të qëndrojë në Madrid deri të mërkurën.
Tensionet tregtare SHBA-Kinë
Tensionet tregtare mes Pekinit dhe Uashingtonit kanë kaluar nëpër ulje-ngritje gjatë vitit 2025, me të dyja vendet që kanë vendosur tarifa gjithnjë e më të larta ndaj njëra-tjetrës.
Në një moment gjatë vitit, tarifat e ndërsjella arritën në nivele treshifrore, duke bllokuar zinxhirët e furnizimit global. Pas kësaj, të dyja palët ranë dakord për një ulje të përkohshme të tarifave, ku SHBA uli tarifat në 30%, ndërsa Kina në 10%.
Në muajin gusht, të dyja vendet shtynë për 90 ditë rikthimin e tarifave të larta ndaj eksporteve përkatëse, duke e zgjatur pauzën deri më 10 nëntor.
Çështja TikTok-ut në tryezën e bisedimeve
Liderët e dy vendeve pritet të diskutojnë gjithashtu mosmarrëveshjen rreth platformës TikTok. Të premten, Kina i bëri thirrje SHBA-ve që të zgjidhin konfliktin përmes dialogut.
Afati për TikTok-un për të gjetur një blerës jo-kinez ose për t’u ndaluar në SHBA është 17 shtator, pasi presidenti amerikan Donald Trump e ka shtyrë për herë të tretë vendimin për ndalimin.
Një ligj federal që kërkon shitjen ose ndalimin e TikTok-ut për arsye të sigurisë kombëtare pritet të hyjë në fuqi një ditë përpara inaugurimit të presidentit Trump në janar.
Ministria kineze e Tregtisë deklaroi të premten se SHBA-të duhet të punojnë me Kinën në bazë të respektit të ndërsjellë dhe konsultimeve të barabarta, për të zgjidhur shqetësimet përmes bisedimeve.
