Në kulmin e tensioneve mes dy vendeve, SHBA-të dërgojnë edhe 5 avionë të tjerë luftarake për të monitoruar hapësirën ajrore të kufirit në Venezuelë, me qëllim luftën ndaj karteleve të drogës.
Pesë avionë luftarakë F-35 të Forcave Ajrore Amerikane zbarkuan në Porto Riko të shtunën, disa ditë pasi Presidenti Donald Trump urdhëroi vendosjen e 10 avionëve luftarakë të fshehtë në territorin e Karaibeve, informon “Reuters”.
F-35 zbarkuan në ish-bazën ushtarake Roosevelt Roads në Ceiba, Porto Riko. Helikopterë ushtarakë dhe avionë Osprey janë parë gjithashtu në zonë ditët e fundit. Të hënën, Sekretari i Mbrojtjes i SHBA-së Pete Hegseth bëri një vizitë surprizë në Porto Riko.
I pyetur në lidhje me avionët, një zyrtar i Pentagonit tha:
“Nuk kemi asnjë ndryshim në qëndrimin tonë ushtarak për të njoftuar në këtë kohë”.
Administrata Trump kishte porositur 10 avionë luftarakë F-35 në Porto Riko për të kryer operacione kundër karteleve të drogës.
Duke njoftuar planet e tij për të vendosur forca shtesë ushtarake në rajon, Trump kishte thënë se qeveria amerikane nuk po fliste për ndryshimin e regjimit në Venezuelë.
Javën e kaluar, forcat e armatosura amerikane sulmuan një motoskaf që dyshohet se mbante drogë, duke vrarë 11 persona në bord, të cilët u përshkruan si anëtarë të bandës Tren de Aragua, një pretendim i mohuar nga Karakasi, i cili tha se asnjë nga 11 personat e vrarë nuk ishin trafikantë droge.
Të shtunën, qeveria venezueliane denoncoi ndalimin e paligjshëm të një anijeje peshkimi nga një anije luftarake amerikane.
