Presidenti Donald Trump ka ngatërruar sërish emrat e vendeve gjatë një intervistë të premten në mëngjes me emisionin “Fox & Friends”, duke përmendur Shqipërinë në vend të Armenisë.
Teksa fliste për marrëveshjet e paqes që ka ndërmjetësuar gjatë presidencës, Trump tha se kishte “zgjidhur luftëra që ishin të pazgjidhshme”, duke përfshirë konflikte si ato midis Pakistanit dhe Indisë, si dhe Kongos dhe Ruandës.
“Unë zgjidh luftëra që ishin të pazgjidhshme. Ah, Azerbajxhani dhe Shqipëria. Kjo vazhdoi për shumë, shumë vite. Kisha kryeministra dhe presidentë në zyrën time. Ata ishin ulur kaq larg njëri-tjetrit. Një karrige ishte këtu, tjetra ishte atje. Unë thashë, ‘Djema, afrohuni. Ejani… Le të përqafohemi dhe të pajtohemi. Dhe, gjithsesi, e zgjidhëm problemin,’” u shpreh Trump.
Në fakt, konflikti i përmendur ka qenë mes Azerbajxhanit dhe Armenisë, dhe jo Shqipërisë. Trump ndërmjetësoi një marrëveshje paqeje midis Azerbajxhanit dhe Armenisë në korrik, duke pritur presidentin e Azerbajxhanit dhe kryeministrin e Armenisë në një samit në Shtëpinë e Bardhë, çka solli përfundimin e dekadave të luftimeve midis dy vendeve.
