Nisur nga arrestimi i dy inspektorëve të Autoritetit Kombëtar të Ushqimit (AKU) sot, 10 shtator, në Berat, në emisionin “Opinion” po diskutohet lidhur me prodhimet shqiptare.
Specialisti i bujqësisë, Arben Shytaj, ngriti një alarm të fortë duke theksuar se shumë toka ku mbillen perime përmbajnë metale të rënda.
“Tokat rreth Elbasanit janë të ndotura, po mbingarkohen me metale të rënda, shumë përtej normativave të lejuara.”
Sipas tij, edhe nëse një prodhues është maksimalisht korrekt në punën e tij, problemi vjen nga uji nëntokësor.
“I ka rënë të jetojë pranë Metalurgjikut ose fabrikës së hekur-nikelit”, tha Shytaj me ironi.
Megjithatë, ai theksoi se rreziku më i madh sot në Shqipëri lidhet me përdorimin pa kriter të pesticideve.
“Për mua duhet të përqendrohemi te mbetjet e pesticideve. Plehrat azotike janë në rritje. Kemi mbetje pesticide në qarkullim që janë me kafkë, rrezik vdekje, dhe përdoren pa asnjë kriter. Madje shiten pa asnjë kriter, sepse këtu nuk ka rregull shitjeje”, tha ai.
Të ftuarit në panel ranë dakord në një, se pesticidet po përdoren masivisht në bujqësinë shqiptare, pa kontroll dhe pa standarde, duke rrezikuar shëndetin e qytetarëve.
